張華峰成功加入工務小組，佢日前去信委員會致謝。
立法會建制同泛民之間嘅關係愈來愈緊張，早前泛民突襲工務小組後，啲建制派議員補飛申請再加入，而金融服務界立法會議員張華峰嘅申請就遇到障礙，本月初，佢出席工務小組委員會特別會議，解釋點解遲咗申請加入小組，點知就畀一眾泛民主派議員「蹂躪」，搞到不歡而散，好在最後都畀佢加入，張華峰前日去信小組，封信嘅措詞都幾特別，完全睇到佢嘅心境。
張華峰當日解釋，佢遲咗申請係因為同助理喺溝通上出問題，表明申請加入小組都係想學嘢，但就畀班泛民質疑佢卸責助理，又話佢想學嘢可以列席，搞到佢好不滿，最後丟低句「唔再畀你哋喺度審！」就拂袖而去。幸好，工務小組都批准佢加入，張華峰前日就去信小組，話經過各委員「溫柔燙貼的詰問後」，感謝大家畀佢加入喎，「燙貼」真係聽落有啲「骨」喎，不過，謝意送達，算係盡咗人事啦。
第一手消息請下載on.cc東網
