林新強寧做消委會委員，都唔做城規會委員。（資料圖片）
香港律師會前會長林新強（Ambrose）自從去年八月被會員罷免後，沉寂咗一段時間，去年底再出山擔任消費者委員會委員。Ambrose透露，佢同消委會有淵源，皆因佢十三年前曾經為幾串提子向消委會投訴，但依家就負責監察消委會運作，都咪話唔蹺！
Ambrose話，當年佢係買生果嘅「熟手技工」，通常會去灣仔鵝頸橋街市買幾串提子，但好多時返到屋企，就發現唔見好多提子粒，但又唔係有提子跌出嚟，懷疑係店東做手腳。點知留意耐咗，就發覺店東將啲提子粒放定落膠袋，或是磅完後先放入膠袋，雖然唔算呃秤，但就點都唔多like，所以佢就打電話去消委會投訴，職員都有了解佢買生果嘅詳情。
講起公職，Ambrose透露政府仲問佢有冇興趣做城市規劃委員會委員，但佢衡量過後，如果要每個星期五都開會，擔心畀律師行其他合夥人詐型，最後婉拒邀請。其實就以新界東北發展規劃為例，搞馬拉松申述會到三月，如果佢真係做咗城規會委員，相信依家已經畀合夥人詐緊型喇。
第一手消息請下載on.cc東網
