政壇：怕網民圍攻商界齊禁聲
最近零售業大商家好似集體潛咗水，唔見佢哋就中港矛盾等發言，點解？我哋收到風，受惠於旅遊業嘅一班商界老闆私底下傾過偈，決定唔再好似以前咁公開發聲，因為香港愈來愈多激進分子，佢哋對勸交嘅聲音都聽唔入耳，商界老闆驚講咗唔啱聽嘅說話，或會惹來網民圍攻店舖，影響生意喎。
所以，零售業界開始有默契，日後若想發表意見，寧願透過商會或團體名義，又或直接向政府反映，費事惹是非，所以近排都唔再個別發聲。
講到最近中港網民爭論激烈嘅內地小童當街便溺事件，有商界老闆話，政府應該承擔起「廁所責任」，最好係喺政府佔大股嘅港鐵沿線做到站站有廁所，咁樣香港市民都得益。對於餐廳食肆通常喺門口張貼廁所唔外借，商界認為情有可原，事關若借廁所嘅客人有咩閃失，餐廳仲要負起保險責任，所以若將提供公廁嘅責任推畀商界，唔係咁公平喎！
