政府係個熱廚房，早排幾個問責第二梯隊官員相繼跳船，政府都招攬咗啲新人，但知名度就有待提升，好似商務及經濟發展局副局長梁敬國（Godfrey）日前出席立法會，就鬧出冇人識嘅鬧劇，擺出烏龍嘅立會主席曾鈺成都知衰，尋日向Godfrey道歉。

曾鈺成解釋，當時自己睇錯貓紙，讀咗環境局局長出嚟，但又知道坐喺度嘅官員唔係黃錦星，加上Godfrey上任後，大家仲未有機會合作，所以先出事囉。佢嘅道歉雖然好過冇，但Godfrey當時嘅處境真係又尷尬又無奈，佢上任之後，已經幾度代局長蘇錦樑頂更，同議會中人亦交過手，但人哋唔識都冇計。有官場中人話，最錯唔係曾鈺成，而係蘇錦樑至啱，事關每逢有飲飲食食或出風頭活動，佢就帶埋政治助理陳百里去威，上立法會回應質詢呢啲難啃嘢，就交畀Godfrey，莫非真係好似傳聞所講，蘇錦樑驚個副局長會搶咗佢個位？

第一手消息請下載on.cc東網iPhone/iPad/Android/Windows Phone Apps