笑意盈盈嘅周浩鼎不時望住撫肚嘅太太，拖實漫步中環。
喺城市論壇與泛民主派數度正面交鋒嘅離島區議員周浩鼎（Holden），好似建制派急先鋒咁，不過，日前我哋喺中環見到佢同腹大便便嘅太太Alice行街，全程柔情盡現，兩公婆十指緊扣，有傾有講，Holden仲不時摸吓Alice個肚，行多兩步又kiss，真係甜到漏。
睇BB車時，兩人有講有笑。
Holden當日同任職國際傳媒機構嘅Alice先喺中環中匯大廈現身，跟住去咗太子大廈一間嬰兒用品店閒逛。佢話太太佗緊BB仔，預產期就係呢幾日，當日係陪太太做產前檢查，然後去買啲嬰兒用品。BB仔就嚟出世，嬰兒用品仲未買齊咩？佢笑笑口話，自己買啲，朋友又送啲，一早已準備好晒，但就好似永遠買唔夠咁，所以咪同太太再去行吓囉！
第一手消息請下載on.cc東網
