「少膽虫，你搞到我頭都大埋！」淫賤黎氣沖沖入嚟。少膽虫衝口一句，「咁大鑊？！腦細你邊個頭變大咗？」閃電之間，又係一記上鈎拳，「梗係頸上人頭，依家打埋你，連拳頭都變大埋！」

少膽虫不明所以，「腦細，究竟發生咩事？」淫賤黎繼續磨拳擦掌，怒氣未消，「你做咩屈人哋買大頭佛涉報大數，搞到《爛果》又畀人話失實啦！」呢一刻，少膽虫先醒起早排冇新聞，惟有搵啲嘢作吓，估唔到……「腦細，你放心，我一早有準備。」

「你有準備？」淫賤黎疑惑。「我已經學咗港鐵嗰招--姓賴！」「姓賴？」淫賤黎愈聽愈不解。少膽虫道︰「我哋可以學人咁賴黑雨，賴部印刷機有問題，報道先會出錯。」「印刷機放喺大樓入面，點會浸壞？少膽虫，你當我傻o架？」淫賤黎舉起拳頭，又要再打，「咦，點解有陣怪味嘅？」「腦細，我驚得滯，所以唔小心瀨咗，你包容吓……」少膽虫慌道。淫賤黎難抵臭味，只好敗走。

計少膽虫話齋，與其賴黑雨，港鐵高層倒不如瀨……仲實際啦！

第一手消息請下載on.cc東網iPhone/iPad/Android/Windows Phone Apps