立法會審議財政預算案拉布十日，搞到部分機構需於下月開始動用儲備，醫院管理局（醫管局）就係其中一個受害者。咁啱醫管局尋日同立法會足球隊踢咗場足球友誼賽，結果醫管局大炒議員隊四比一，唔通球場上報仇？

「長毛」梁國雄（左）落到球場，「拉布」變拉衫，茅招盡出。

梁國雄

立法會足球隊陣容有隊長陳克勤、議員郭偉強、梁志祥、醫學界嘅梁家騮（怪醫）及早前踢波斷腳後首次復出嘅「拉布」議員梁國雄（長毛）等。醫管局陣容就唔少得行政總裁梁栢賢（PY），比賽開始前，長毛疑似「淆底」，不斷話：「友誼第一呀，唔好太茅！」PY就話中有骨：「毛哥十六號，大家認住佢喇！」比賽開始，醫管局撳住立法會係咁砌，頭嗰十幾分鐘就輕鬆入咗兩球，到下半場，立會隊至識得反擊，但都不敵醫管局嘅精英隊後衞，最終輸波收場。

長毛喺立會拉布，尋日就喺球場掹衫，仲拉跌人添，結果梗係犯規啦。克勤賽後分析敗因，話可能大家「拉布」太攰，郭偉強就同長毛講，不如以後用「拉布」嘅時間嚟練波。

第一手消息請下載on.cc東網iPhone/iPad/Android/Windows Phone Apps