內地募捐兵團 打劫港人愛心

呢批持雙程證嘅募捐兵團有男有女，都係廿歲左右，疑似聾啞人士，佢哋嘅蹤迹遍及全港各區。本報記者跟蹤追擊其中一組活躍喺旺角油麻地一帶嘅一男三女募捐兵團，發現女成員手上都攞住寫有「關愛殘疾人——愛心捐獻」嘅記事簿，上面有「殘疾人」以及「捐款$30-50」嘅字眼。嗱，募捐居然明碼實價，擺明有蠱惑喇。

募捐兵團專門喺巴士站或餐廳等人流多嘅地方向途人索捐，記者跟咗兩粒鐘，發現每位成員分別成功向約三十名途人籌到善款，按平均每人捐四十蚊計算，兩粒鐘就有三千幾蚊進帳，都幾可觀o架。

本來呢，助人為快樂之本，善事唔怕做，之不過咁，如果遇上掛羊頭賣狗肉嘅騙徒，咁就唔同講法喇。呢，呢班募捐兵團扮到好似受內地一間著名社福機構委派咁，但記者調查發現，有關機構證實從未授權任何人募捐，即係話，有人以慈善為名，打劫港人愛心。

正所謂，名不正則言不順，募捐者何方神聖成謎，市民捐款用咗去邊冇人知，唔使問阿貴，實有蠱惑喇。話口未完，上述一男三女募捐兵團當晚就被警方拘捕，事緣有三名中學生喺巴士站遇上呢班人籌款，對方嫌其中一位同學捐得太少，要求加碼被拒絕，竟然當街強搶善款。同學愈諗愈唔對路，於是報警求助。

其實，無論係行善定係行騙，呢班募捐兵團都好有問題。根據入境事務條例，任何人持旅遊證件來港，從事行乞、籌款等活動已經違反咗逗留條件，最高可判監禁兩年及罰款，如果加上搶劫罪，更係罪加一等。

話時話，香港慈善組織眾多，由於泥沙俱下，良莠不齊，一般市民根本分唔清真募捐定假募捐，隨時做咗羊牯都唔知。弊在港府對慈善活動嘅監管漏洞多多，法改會舊年底提出所謂改善措施，只係建議所有慈善組織必須註冊，但就冇講明由邊個政府部門負責監管，咁嘅制度同無牙老虎有乜分別？

港人善心被利用，做好事冇好報，騙徒名利雙收，講到底都係政府監管不力造成。計太一叮話齋，如果繼續任由呢啲掛羊頭賣狗肉嘅募捐兵團橫行，香港呢個愛心都市遲早淪為「無良都市」嘅咋，叮！