潮語「熄機」嘅意思，即係希望某人可以永久收聲，甚至消失，亦可以用嚟形容想中止一段關係。情形就好似唔鍾意睇某啲電視節目，或一啲電台節目，你可以隨時「熄機」樂得清靜。有啲情侶，會用「熄機」代表分手。就算係一段合作夥伴關係，某一方想中止合作，各散東西，都可以用「熄機」去代表。不過，如果用得「熄機」去代表結束，某程度上呢段關係都夾雜住一點怨恨，總係你對我唔住，我要「熄你機」！好來不好去。

近呢兩年，特區政府施政混亂，加上大量膠官庸奴把持朝政，面對傳媒或公眾場合嘅發言愈嚟愈離譜。講大話同語言偽術出事卸責呢啲都已經司空見慣，最難頂嘅係有啲人講嘢，為求擦阿爺鞋同向主子表現忠君愛國，可以是非顛倒，無視現實，完全不顧及香港人民感情，只顧取悅同我哋非親非故的中土恩客，呢樣嘢真係令人氣憤難平。

最近有人話港鐵擠迫，係因為香港就業情況改善，多咗人搭地鐵返工，而非全關個人遊旅客來港，導致香港人要「等多幾班」港鐵先上到車。此話一出，全城憤怒。港鐵搭客數字嘅升跌，係有紀錄可查，亦係一條簡單嘅數學題。個人遊旅客數字暴漲逼爆港鐵係鐵一般嘅事實，有搭過港鐵都知，千祈唔好噏得就噏，真係好想可以即刻「熄佢機」!

呢個潮語出處，據估計應該係嚟自上世紀嘅遊戲機中心，俗稱「機舖」嘅地方。因為以前有個叫《街頭霸王》嘅經典格鬥遊戲，可以供兩個人同時對戰。如果有一方喺對戰過程中屈機，又或者唔跟規矩玩，另一方係有權掣「熄機」關上電源，令該局遊戲作廢。以前，古老遊戲機開關掣係喺機頂，可以自行開關嘅。

其實，如果有一張香港政治人物「熄機」名單，可能有水蛇春咁長。不過，香港最需要「熄機」嗰個人，你同我都永遠「熄」佢唔到。仲有排你捱呀！

第一手消息請下載on.cc東網iPhone/iPad/Android/Windows Phone Apps