設計圖片及對白
新民黨同沙田地區政團公民力量（公記）結盟後，擴闊版圖已經唔使講，政圈更關注嘅係佢哋喺二○一六年立法會選舉嘅部署，據講，新民黨想到時喺新東多取一席，但究竟由誰人參選就依然眾說紛紜。依家新民黨喺立法會只有兩席，主席葉劉淑儀面向全港嘅盤算係幾多席呢？
派邊個選都受質疑
有人話，二○一六年嘅參選部署好重要，由於公記嘅地區味道太濃，團體內又缺乏知名度高、喺地區好搶眼嘅明星級議員，要靠佢哋喺立法會爭一席位，其實難度唔細。所以，另一個理想選擇可能係由新民黨空降人選落區，不過，公記扎根地區咁耐，如果空降可能又掀內部紛爭噃。
話口未完，又有人話，不如搵番已加入公記嘅工業界立法會議員林大輝，及上屆曾代表公記出選落敗嘅沙田區議員龐愛蘭出征喇，如果係咁，就可以解決知名度嘅問題，但又有新問題啫，事關公記要讓地盤喎。
其實公記內部都有唔少諗法，有消息就話，佢哋最希望將呢個機會留番畀佢哋啲青年成員，咁先算係同新民黨嘅真正結盟，大家以後可以平等共處咁話。咁講，咪即係大輝同龐愛蘭都未必有機會喇！
公記確有唔少富有地區經驗嘅青年軍，包括沙田區議員林松茵、陳敏娟、梁家輝及姚嘉俊等，但除咗沙田區居民認識佢哋，走出沙田區就冇咩人知嘞。二○一六究竟邊個上位，葉劉插旗時，真係要慢慢度至得。
第一手消息請下載on.cc東網
