上星期五晚，以企業業績理想以及消費者信心指數創七年新高為藉口，美股三大指數全線抽升，道指升263點，收報16,380點，整個星期計，道指由最多跌689點，收窄到跌164點，周線圖上，出現長尾錘頭的短期轉勢形態。至於一度落到年半低位1.86厘的十年美債孳息亦都一樣，上周五已反彈至2.2厘水平。美股恐慌指數（VIX）上周中曾飆升至31.6的近三年高位，周五大幅回順至21.9。

中廣核美亞母企，為全國三間擁有核電項目開發技術企業之一。（資料圖片）

太陽日誌

港股上星期日升日跌，總結整周累積跌65點或者0.3%，收23,023點，險守兩萬三關口。睇番過去幾個月，恒指由九月初高位25,362點，輾轉跌到低位22,565點，甚至跌穿滬港通消息公布前水平。在下已經講過，太多人一廂情願以為○七年港股直通車的歷史可以重演，結果齊齊表錯情。

事實上，滬港通確有利AH股差價收窄，觀乎過去兩個月，A股跑贏了大部分成熟市場指數，政策目的無疑係為封閉的A股引入更多外資機構投資者參與，也配合祖國逐步開放資本帳。

內銀股值博之選

反而市場最憧憬的內地投資者南下炒港股，由消息公布以來港股先抽升後跌凸的反應，真正幫助有幾大，唔使畫公仔畫出腸。即使個別內地知名而A股又無的企業，好似騰訊（00700）、聯想（00992）一類，會多咗一批內地捧場客撐場，但對於港股整體市值的幫助應該並唔明顯。

中國銀行（03988）為內銀發優先股增資擴股揭開序幕，最終65億美元的優先股，以6.75厘定價，較上半年市場預期的8至9厘，甚至八、九月時估計的7至7.5厘都要低。如此結果，到底純粹因為今年環球國家主權債券息率級級落，好息之徒買到無嘢好買，抑或相信內地銀行資產質素，最終在阿爺出手包底下，唔會衰得去邊？看來兩個因素同時存在。

有些少意外的，反而係中行優先股咁樣定價，但正股股價上星期卻升得咁少。不過無論如何，短期想搵低風險而值博率相對較高的選擇，內銀應該係首選。

雅居樂供股焗跟

雅居樂（03383）五供一計劃終止，取而代之係八供一計劃，計過度過，供股集資額加埋本身現金，十二月的過度性貸款問題唔大，至於未來銀行會唔會趁火打劫，令利息成本上漲仲係後話。反而暫時仲未知主席陳卓林之後會有乜下文，尤其是會唔會觸發到期銀行貸款及債券的控制權違約。

不過，講到底，若然銀行真係逼Call loan，最終變壞帳大家都無好處，由雅居樂的公司債上周明顯見底反彈，可見債券玩家明顯無股民咁悲觀，基於近排股價急瀉，現價一四年市帳率已跌到近0.35倍，除非得三、兩手供完變碎股，否則實在無乜理由唔去供等攤薄。

半新股中廣核美亞（01811）在近期跌市中都算硬淨，十月以每股1.71元上市，掛牌首日的1.88元經已係低位所在，之後見過2.46元，上周五收2.18元，升五格。論往績估值，中廣核美亞唔算平，但勝在集資七成會用來收購母公司資產，中短期內，股價都有注資概念頂住。

集團現時手上發電機組中，潔淨及傳統能源比例大約為52%及48%，中央要向環境污染宣戰，傳統石化燃料發電行業的增長，未來肯定不及潔淨能源快，母公司又係全國三間擁有核電項目開發技術企業之一，令到中廣核美亞在行業中具技術優勢。上周四股價試2.08元後企穩再發力，如果今個星期能夠重上2.2至2.3元，短炒可以留意。

滬A報價快而準

滬港通開通在即，「東網Money18」已設有滬港通專頁，並有滬A報價及專家評論，可讓讀者掌握最快最新市場資訊，萬勿錯過。