上個禮拜大圍站翻叮成功，今個禮拜五再有曾經流標嘅住宅地截標。呢幅地皮係今年三月未能批出嘅大埔白石角科進路住宅地，月前隔籬嘅科研路住宅地順利以低價賣出，反映到政府面對現實，肯平賣地皮。劉Sir相信今次幅地再流標嘅機會唔大，市場估計地皮成交價可以達22.9億至26.5億元。

大埔白石角科進路住宅地，市場估值最高約26.5億元。（資料圖片）

高緯環球張翹楚相信，今次白石角科進路地皮流標風險好低。（資料圖片）

本周五截標的白石角科進路住宅地係大型發展地皮，可以起到71.58萬方呎樓面，可以參與嘅財團唔多。幅地喺今年三月曾經流標，當時收到7份標書，競投財團主要係大發展商，市場估計每方呎樓面地價最少5,000元，惟入標太低，政府收番幅地，市場傳聞幅地最低入標價每呎只係樓面地價約4,000元。

之後隔離幅科研路住宅地拎出嚟賣，喺五月成功以24.12億元批出。不過，每方呎樓面地價只係3,300元，創區內呎價新低，反映到政府為避免流標，主動減價。

每呎樓面料3700元

高緯環球張翹楚同劉Sir表示，捲土重來嘅科進路住宅地，雖然地皮嘅剪裁彈性唔及月前批出嘅科研路住宅地，但相信科研路批地價經已見底，加上市場已慢慢消化新界地價回落嘅現實，相信今次流標風險好低。

張翹楚預期，科進路地皮成交樓面呎價約3,300元，同科研路差唔多。呢幅地皮位處臨海地段，地盤面積約20.45萬方呎，而市場估計，科進路地皮樓面呎價介乎約3,200至3,700元，成交價料約22.9億至26.5億元。

今年度供應可達標

事實上，近排已先後有流標地皮成功再批出，包括市區重建局觀塘市中心重建計劃第二及三發展區，同埋上個禮拜批出嘅港鐵（00066）大圍站上蓋物業發展項目，兩項目投資額都超過百億元。

其中大圍站投資額更高達200億，所以今次截標嘅科進路地皮，規模相對較細，因此可望成為短期內第三個「翻叮」成功嘅住宅地皮，相信政府今年度嘅住宅單位供應目標亦可以達到。

大埔白石角科進路住宅地小檔案

佔地：204,520方呎

總樓面：715,819方呎

市場估值：22.9億至26.5億元

每方呎樓面地價：3,200至3,700元

截標日期：本周五