原叫「漢能太陽能」嘅漢能薄膜發電（00566），呢期利好消息不斷放送，上周五以接近全日高位1.73元收市，狂飆8.1%，由九月低位1.25元起步計，至今累積升幅接近四成，技術上已進入超買區，畏高的話可以等回調至10日線1.57元支持先再考慮。阻力位1.9元，支持位1.5元。

去年以來，漢能頻頻收購CIGS（銅、銦、鎵、硒）薄膜太陽能技術，用新名旨在反映公司專注薄膜技術，而且比起多晶硅產品，技術及用途均較高同廣泛，代表業務「升呢」。佢喺去年下半年開始建造及銷售業務，而之前只係得製造業務，現時兩大分部為製造矽基薄膜發電組件製造用設備及整線生產線，同埋建造太陽能電站或屋頂電站。

睇番成績表，集團今年上半年收入增長五成至32億元，純利增長兩成至17.2億元，原因係銷售生產線的營業額上升。早前暴炒妹推介呢隻股時，已話過佢可在英國宜家以「漢能」品牌推銷及展示其太陽能發電系統整套方案，近日公布將業務拓展至荷蘭同瑞士，同時於未來十八個月內進駐另外6個國家。另外，漢能剛與美麗家園（01237）合作開發新型智能家居木屋別墅產品，以及薄膜光伏組件木製產品，為期三年。