Fundman睇市：內銀股 再跌空間有限

今次跌市，絕對有資格定性為小型股災，尤其承接力單薄之下，唔少基金愛股跌幅相當誇張，電力、家電、電訊股之後，上星期四、五連燃氣股都開始見到要錢唔要貨的情況。

美股吸引資金流入

過去幾年的超級寬鬆貨幣政策，變相鼓勵借錢去賭，一旦退市預期升溫，長債息反彈，去槓桿點都會持續一段時間，資金唔再係沽債買股咁簡單，而係乜都沽。大行資金流報告顯示，上星期環球債券基金錄得75億美元淨流出，商品10億美元淨流出（連續第十九個星期），Money market基金250億美元淨流出（去年十月以來最多）。雖然表面上股票基金有48億美元淨流入，但撇除流入美國指數基金及日股的70億及7億美元，其他股市相當大鑊，新興市場連續五星期淨流出，上周再流走34億美元（最傷的A股累積38億美元淨流出），數字大致看到資金取捨，全面降低槓桿之外，即使買股票都揀經濟復甦較明顯的美股！

四月時，筆者建議讀者們沽出當炒股，將部分注碼換入成交夠大的內銀股，市升當然無執輸，萬一真係雞犬皆升之後氣氛逆轉，至少有逃生機會。雖然內銀論跌幅，少過同期唔少二三線，但最失預算係估唔到美國退市預期，猶如世紀病毒般迅速在股市蔓延，若然當時索性建議減磅揸現金，或者可以幫大家再減低一點損失，但也不得不佩服淡馬錫及高盛等內銀大玩家，在跌市前搵到其他大孖沙接晒手貨咁厲害。

屋漏兼逢連夜雨，銀行半年結前，內地水緊的情況浮面，隔夜及一星期拆息，上周四均升至歷史新高，有傳四大行在拆借市出現違約，要人行定點注資照顧，當然消息最終例牌被否認，但今時今日個市草木皆兵，已足夠令內銀股股價一仆一碌。

內地拆息抽升相信只是短暫性質，人行或遲或早，定必會在資金最緊張的半年結前後一個星期出手打救，故儘管未能確定內銀上星期五已見了今浪低位，但相信離今浪谷底應該唔遠。不妨睇番四大行上星期五的成交額，都創出今年新高，除淡友冚倉外，更似是中期跌浪以恐慌性拋售作為終結。

不得不承認，經過幾年的表現，內銀股像周期股多於長期增長股的市場現實。近日，大行陸續向下修訂內地經濟增長預測，內銀不良貸款見底回升，以及逐步推利率市場化的長期憂慮，在嚴重壓縮的估值中，相信反映得八八九九，以三至六個月為限，現水平看來，上升的機會應高於再跌的可能。