樓市出更：銅鑼灣內街舖加出個吉

銅鑼灣白沙道現時有近20個街舖，租戶以鐘錶店、時裝店及老牌餐館為主。

銅鑼灣核心消費街嘅地舖有「北水」照住，租金自然貴得有道理。不過，區內有啲「一線尾」街舖，唔係內地豪客「血拼」地段，業主亦狂加租，令吉舖大增。其中喺希慎廣場附近嘅白沙道同埋蘭芳道，近排罕有咁總共有6個吉舖招租，租金較之前大幅高出約40%至逾1倍。其中白沙道有個交吉咗幾個月嘅街舖，業主依家企硬叫緊每月約50萬元，比起前租金大增達約1.5倍，升幅拍得住羅素街。

經常到銅鑼灣逛街消費的王先生希望，銅鑼灣區一線尾街舖業主能體恤小商戶，降低加租幅度。

來自港島南區的林小姐認為，「老店」要在一線區生存，首要是要提升產品的吸引力。

銅鑼灣白沙道及蘭芳道吉舖招租情況

有代理同劉Sir講，近年銅鑼灣羅素街等一線街舖租金升幅都以倍數計，平均呎租2,000幾元。由於長年累月都有客等租，鐘錶金行同埋化妝品店等承租能力較強嘅商戶，已轉為搶租同區利園山道、啟超道及恩平道一帶，帶旺租金升幅亦以倍數上升，平均呎租已超過1,200元。

約滿即加商戶窒步

白沙道同埋蘭芳道街舖業主憧憬租金升浪，租客約滿就即刻加租，加幅40%起步，每方呎叫租升至約170至330元不等，但係租賃氣氛未如理想，近半年呢兩條街已經有6個吉舖。有代理話，內地豪客嚟到銅鑼灣，梗係去時代廣場、希慎廣場、羅素街同東角道等地舖掃貨，就好少特登去區內一線尾街道逛街，大型商戶又點會以進取租金進駐。

佢仲話，白沙道近二十間街舖，依家租戶以鐘錶店、時裝店同埋老牌餐館為主，有兩間吉舖，其中一個雙號街舖，原本時裝店租用，月租約莫20萬元，搬出後，業主依家叫租每月約50萬元，呎租升至約330元，租金升幅達約1.5倍。