恆指期貨走勢2013/6/21

上星期五，港股低開高收，收市仍要跌119點，報20,263點，完成連跌六星期的金融海嘯後紀錄之外，上周五低位19,969點，亦終於完全回補去年九月在20,146至20,475點留低的上升裂口。按原訂計劃，筆者在上周五早市以三分之一注碼，開始重新入市開好倉，入市價介乎20,020至20,080點之間。

恆指期貨走勢2013/6/21

補回去年九月裂口

隨着美國聯儲局拋出退市藍圖，內地拆息在銀行半年結水緊下急升，上周四隔夜息曾見逾20厘的歷史新高，衰啲講淡友做市真係予取予攜，要幾低有幾低，但14日RSI去到22.2的近兩年最低位，加埋去年九月重要的裂口已補回，壞消息盡出之下，以小注一試博反彈，總比跌穿兩萬點才去追沽值博。可惜，上星期五美股唔算太配合，道指得41點進帳，收報14,799點，夜期也愈喊愈低，最後以19,951點收市。

雖然十年期美債息再試2.531厘今浪新高，反映退市疑慮仍在升溫，不過，除非今日收市確認期指跌穿19,975點，否則暫時不打算將新建好倉止蝕，恃住自己只係細細注，筆者一於同個市鬥長命。