隨着國家隊重新入市，內地股市氣氛有望逐步好轉，對券商股有利。(資料圖片)

上周伯老終於交代美國退市路線圖，加上撞啱半年結內地資金異常緊絀，搞到環球股市大震盪，到咗上周五，內地拆息回落，恒指跌至兩萬點心理關口初現支持，觸發部分淡友平倉，而一直在等入市機會嘅炒家亦乘機進場試博反彈，結果上周五恒指收報20,263點，跌幅收窄至119點，成交達971億元。阿莊相信，如無意外，本月嘅低點已見。

隨着國家隊重新入市，內地股市氣氛有望逐步好轉，對券商股有利。(資料圖片)

唔少缸邊友估阿爺會出手救市，但阿莊就有保留，事關近期流動性緊張不過係暫時性，且時值宏調到咗攻堅階段，相信上大人唔想任何放水行動被市場錯誤解釋為「鬆手」甚而揣測貨幣政策再趨寬鬆，故建議大家別對魚缸短期回升動力存過高期望，且耐心等候七月大市喺低位築底鞏固，再定下半年策略。

強弱股身份對調

上周魚缸出現一個現象，就係強勢股轉弱，弱勢股回穩。次季表現一直跑贏大市嘅強勢板塊開始逆轉，博彩股係好例子，上周銀娛（00027）由高位44.95元急回至上周五低位39.05元，跌幅13%！弱勢嘅煤炭及鋼鐵股則回穩，上周五神華（01088）及中煤（01898）分別升2%及4%，鞍鋼（00347）及馬鋼（00323）則分別升7.8%及2.2%，五礦資源（01208）亦急彈10%。雖然現階段難以肯定是否有長錢開始重新部署經濟周期性股份，包括資源股，但六月底這一個現象值得投資者注視，且看第三季長去路向會否漸趨明朗。

短線博反彈即市睇勢自動波，最緊要量力而為，記住尚未到瞓身入貨時候。做定功課，為未來一季作部署的話，則有三不揀。第一，唔揀息口敏感股，事關未來一段時間魚缸估值會先行反映低息環境將會結束呢項因素，從事息口敏感行業嘅股份沽壓難消，而負債較高嘅股份估值更要打折。第二，唔好揀盈利前景不明朗嘅中資股，如奢侈品股、重機股及航運股，尤其係上半年內地經濟表現遜於預期，行業需求展望仍然負面，股價將繼續跑輸大市。仲有一樣唔睇好嘅係家電股，皆因補貼政策結束對銷售嘅影響將逐步浮現，加上城鎮化規劃遲遲未見落實，去年行業銷售比較基數又較高，暫難發圍。

至於嚟緊一季可以留意嘅板塊，較有信心嘅係中資券商股，事關股市表現往往行先經濟，而近日國家隊經已開始重新入場，七月內地順利重啟IPO嘅話，一大不明朗因素消除，即使指數表現受多項因素掣肘，但魚缸交投有望改善，券商股可受惠。