魚缸Blogger：合生元強勢未止

蒙牛乳業（02319）繼五月增持現代牧業（01117）股權後，上周再以每股3.5元買起雅士利（01230），股價一度挾到去29.35元的五十二周新高，可惜上周五嘔番半成。另一奶粉股合生元（01112）就逆市炒上，升到五十二周高位48.4元，以47.65元收市，升幅4.3%，再次突破暴炒妹之前的目標，承接強勢，下站可睇52蚊。

合生元去年純利增長四成，至7.43億元人仔，而今年首季「媽媽100」活躍會員人數比去年同期多近六成，至166萬人，會員制度同分銷網絡優勢可見一斑。近日法巴及滙證都出報告叫人買，分別畀佢目標價49.2元及62元。睇番當日爆上原因，內地公布多部委的「奶粉新政」，要求嬰幼兒配方奶粉生產及進口商落實質量安全責任追究制度，並增設「五不准」，有助淘汰無生產條件、唔達標嘅企業，相信對合生元前景有利。