政壇：立會保安阿頭涉阻毓民架車走
立法會財務委員會（財委會）早前審議新界東北發展規劃前期工程撥款，當時唔少市民群情洶湧包圍立法會，其中人民力量主席袁彌明（Erica）喺六月十三日，仲涉嫌用車阻礙建制派議員開車離開，涉違反《立法會（權力及特權）條例》。不過，原來事件仲有下集，有匿名人士去信立法會，指有前線保安員收到柯打，要企喺毓民架車前面擋住，好畀其他議員先開車離開。
黃毓民表示立法會總保安主任涉嫌阻礙他離開立法會，可能違反特權法。
匿名人士七月初去信立法會主席曾鈺成同六名泛民主派議員，包括獨立泛民黃毓民，投訴總保安主任喺六月二十日財委會會議當日，用無線電通訊向保安部同事下達清晰指令，要求同事「詐傻扮懵」企喺毓民架車前面擋住，務求畀其他議員先走，涉嫌違反《立法會（權力及特權）條例》。毓民收到呢封投訴信好火滾，即刻去信曾鈺成，要求立法會提供總保安主任嘅指示同相關無線電通訊。到七月二十二日，秘書長陳維安搵埋副秘書長林鄭寶玲同毓民開過會，毓民引述陳維安話，聽完錄音後承認總保安主任落過阻礙佢嘅指示，該總保安主任解釋認為毓民同Erica涉阻礙事件有關，所以下達指令喎。
行管會至今仲等緊秘書處呈交報告，之後先決定點樣跟進事件。毓民話事件如果屬實，該總保安主任涉嫌違法，非常嚴重。毓民要求就事件進行紀律聆訊，而涉事人期間要停職受查。我哋問過秘書處，但佢哋未有回覆。
