政壇：內蒙訪病童 何國鉦感觸
啱啱過去嘅暑假，好多人都感到萬分充實，多位本港名人都唔例外，佢哋趁住暑假尾段，同內地多個機構嘅人士齊赴內蒙古，既為當地五十五名弱視兒童義診，又向特別貧困家庭提供免費治療。一隊名人見證邊遠地區貧困家庭嘅壓力後，對香港嘅良好條件更深有體會，著名時裝設計師何國鉦先生（Dorian）更有感而發：「我們身在香港實在是太幸福了！」
何國鉦、趙曾學韞（後排左及中）早前到訪內蒙古一間醫院，幫助弱視兒童。
今次活動係由香港善學慈善基金聯合創始人趙曾學韞、香港國際眼科基金主席謝偉業醫生等發起，並邀請咗基金2014年慈善晚宴籌委會主席張筱蘭博士同Dorian參加，亦因此，造就張、何兩人首次踏足內蒙古，趙曾學韞就已經係連續三年到訪內蒙古，第一次踏入內蒙古嘅Dorian，對當地資源短缺好感觸，佢話，香港小朋友根本無法想像國土嘅另一邊，資源會咁缺乏，佢舉例話，當地嘅小朋友會因為一包餅乾而開心一日，呼籲香港人珍惜資源，亦力所能及去幫人！
講番基金嘅活動，過往四年多，基金嘅弱視工程已經喺內地多個地區為八百個弱視兒童提供免費治療，每個病童嘅治療費用高達港幣三千五至六千元。
