政壇：呂明華暗窒大輝亂批評？
中華廠商聯合會（下稱廠商會）副會長吳宏斌（Dennis）近日有新動向，出任一間天然珊瑚專門店嘅香港店董事總經理，佢老友紛捧場，譬如做過三屆廠商會立法會代表嘅呂明華、廠商會立法會代表林大輝同盛傳有意爭取下一屆立法會工業界議席嘅廠商會會長施榮懷都前後腳到場。
呂明華（右）與施榮懷相遇兼握手。
前年底大輝唔顧廠商會立場，支持立法會對特首嘅不信任動議，令大輝同廠商會嘅關係變得微妙，內部有傳換人之聲。呂明華點睇個人政治取向與廠商會利益呢？佢好認真咁話，廠商會利益即係國家利益，如果特首冇做錯嘢就唔應該將自己嘅政治取向凌駕喺廠商會利益之上，立亂批評。嘩，佢係咪講緊大輝呢？呂明華即刻澄清話唔係喎！冇耐施榮懷趕場嚟到，佢就話從未同大輝討論過邊個代表廠商會出選，仲笑笑口話，一六年先至選舉，時間尚早，係都等選完會長先啦！
呢個專門店係台灣最大嘅珊瑚店來港開店，台北經濟文化辦事處處長嚴重光等台灣幫都有到場。Dennis話，珊瑚價值唔止貴過黃金，最頂級嘅紅珊瑚身價比翡翠更高。
