政壇：李華明掟2000萬掃豪宅
政府推出穩定樓市雙辣招，但市民似乎唔怕辣，入市者絡繹不絕，令樓價接連破頂，我哋得知，就連前立法會議員李華明都冇有怕，近排入咗市，仲連遠期樓花都照殺！估唔到肥仔明唔做議員走去開顧問公司，短短兩年間就買到二千萬元嘅新樓，仲要樓價唔貴唔買，唔通家吓真係咁好搵？
李華明自立門戶兩年，就做豪宅業主，果然似牆上揮春咁生意興隆。（資料圖片）
話說尋日肥仔明同太太、囡囡一齊去抽將軍澳區新樓盤天晉IIIA期，仲畀囡囡抽中一個售價近二千萬元嘅單位，據講係5B座高層特色戶，實用面積1,137呎，連一個一百呎嘅平台。
肥仔明話，今次係佢屋企首次買新樓，估唔到都抽得中，一家人一齊供喎。其實佢哋依家都租住緊呢個樓盤嘅第一期一個單位，呢個樓盤嘅第二期都仲未入伙，但早兩年已經賣晒所有單位嘞，而今次佢哋入手嘅係第三期單位，雖然要兩年後先落成，但同第二期一樣咁搶手，佢哋抽到已經係「次理想」嘅單位喇。話晒都係遠期樓花，真係唔擔心樓價跌？肥仔明話，佢都唔係炒樓，所以個樓市升跌都唔關事喎。
