設計圖片及對白
泛民陣營呢輪表面係聚焦「佔領中環」行動，內裏卻鬼打鬼，而泛民黨派對佔中三子「打骰」下一輪抗爭都諸多不滿。據聞，部分黨派不滿佔中三子之中嘅戴耀廷同陳健民書生論政，戴耀廷一時玩激情、一時亂講嘢，玩到泛民陀陀擰，日前又自爆以「去飲」為佔中代號，佢雖然一副「佔中秘笈」喺手嘅樣，但人哋可能覺得佢廢噏當秘笈，以致泛民陣營中不滿聲音愈嚟愈多，仲希望呢場「飲宴」快啲散場，等各黨可以部署自己想做嘅事。
向傳媒講嘢倒米嚇壞人
戴耀廷喊佔中已經好耐，但佔晒上下左右都未佔到中，反而走去搞毅行爭普選、民主登高、剃頭決志同明日嘅黑布遊行，全部有頭威冇尾陣。呢一系列佔中「前菜」，泛民大佬似乎都冇乜胃口，直言浪費時間兼消耗意志，據知佔中方面原本屬意民主黨劉慧卿同公民黨余若薇兩位「阿姐」剃頭，兩個阿姐梗係睬你都傻啦，結果，當日大部分泛民議員都唔見影。
「前菜」冇味，戴耀廷早前又忽然悲觀，搶先向國際通訊社彭博（Bloomberg）自招佔中策略失敗、佔中人數可能減少，倒自己米嚇傻唔少泛民，佔中秘書處亦不得不急急發聲明澄清。仲有呀，日前佢又話佔中以「去飲」為代號，但佔中核心成員都話，睇報紙至知，究竟佔中三子圍威喂？定係有人口多爆大咗？咁就唔知喇，但搞到呢步，佔中呢盤「主菜」真係連泛民中人都冇乜厚望囉。
第一手消息請下載on.cc東網
