政壇：罷課殺到 吳得掂去玩
專上學生團體將喺本月二十二日發動罷課一周，中學生團體亦話要發動罷課一日，有人話，呢次可能係回歸以來最多團體同勢力動員嘅罷課活動，同一時間，教育局局長吳克儉（吳得掂）卻放假去，佢定於本月十六日至二十四日放假九日，佢就逍遙喇，難為副手、教育局副局長楊潤雄（Kevin）要頂硬上，喺罷課期間面對可能出現嘅棘手風風雨雨。據講，吳得掂都呻暑假以來避小學派位、避開學，偏偏避唔開罷課喎！
設計圖片及對白
失問責官基本承擔
近日各大中院校都紛紛開會，研究應付罷課嘅對策，譬如研擬罷課期間可能出現嘅問題同制訂應變方法，學校管理層亦嚴陣以待，但統領全港教育工作嘅吳得掂就揀正呢段時間放假，冇同全港教育界一齊應付罷課，難怪唔少業界中人唓唓聲。佢喺國教風波中嘅表現雖然令唔少人失望，但今次喺罷課玩潛水，就連問責官員最基本嘅承擔都畀人質疑，究竟吳得掂係避政治風頭？定係怕再度孭鑊呢？
稱有大事會即銷假
據講，佢過去兩年放假少於自己可享假期嘅一半，今次假期亦早喺六月部署，仲為咗避開小一派位、八月尾九月初嘅開學，以及原本以為嘅佔中高危期等事件，將假期一再延後，點知，定咗假期後，學聯先公布罷課時間。
消息話，吳得掂呢幾日都提前同啲同事開定會，講明即使佢放假，有乜情況都隨時通報佢，仲預咗有大事嘅話，就立即銷假提前現身喎。
雖然吳得掂有自己嘅解釋，但做佢副手嘅Kevin就要焗擔大旗，以署理局長身份應付罷課，今次真係老細去威、做o靚嘅啃晒，喺政府體系打滾咗二十幾年嘅Kevin表現點？好快就有答案！但有圈中人講笑，傍住個咁嘅上司，真係唔知算Kevin好彩定唔好彩囉。
