設計圖片
中港矛盾愈演愈烈，康樂及文化事務署最近都捲入漩渦，事關我哋收到投訴，質疑該署連公共體育設施如足球場、度假營甚至訓練班等都可以畀非香港居民使用，投訴人質疑呢啲究竟係「好客之道」，定係分薄港人資源？呢個時候撞上中港矛盾嘅靶心，康文署署長馮程淑儀呢次真係幾麻煩，點知查問之下先知誤會一場，事關康文署設施一直開放予非香港居民使用，最近康文署就推出新招，防止有港人濫用租場制度。
據了解，由兩個市政局年代開始，政府已推動「全民運動」，非香港居民都可以用旅遊證件，包括護照、雙程證去預約場地。康文署解釋，因為來港工作或旅遊嘅非香港居民都有做運動嘅需要。但年前申訴專員公署揭發有港人用身份證、特區護照甚至回鄉證預約場地，年半前康文署收緊規定只准港人用身份證預約，非港人就另有登記做法。今個月起，署方更統一非港人網上同櫃枱預約嘅做法。
睇番資料，一年半以來只有九十三名非港人登記為預約康體設施嘅臨時用戶，截至今個月初仲剩低十九人，對比數以十萬計本港用戶真係好少，又何來分薄咗港人嘅資源呢？
第一手消息請下載on.cc東網
