政壇：鄉事組黨互扯貓尾
鄉紳組黨變完再變？鄉議局主席劉皇發（發叔）自上月接受報章訪問提到佢哋討論過組黨一事，副主席林偉強之後就多次喺電台講到組黨幾咁「迫切」，但發叔日前卻疑似縮沙，話自己冇講過組黨，只係構思整合鄉議局為參選部署喎，咁究竟組黨真唔真o架？林偉強尋日上電台節目又有新講法，佢話組黨工作進度正常，只係發叔一向穩重，所以講得小心啲，但林偉強都爆咗個新講法，佢話今次係鄉事組黨，而非鄉議局組黨。鄉議局正副主席各有一說，莫非擔心組黨激嬲西環，所以互扯貓尾、掩護鄉黨大計？
設計圖片及對白
坦言萬事起頭難
林偉強尋日出席電台節目，一開始就話組黨工作進度正常，又話組黨嘅構思唔係今時今日先至諗，早於九十年代就有搞過，但因時際遇，所以搞唔成。依家組黨係迫在眉睫，簡直講到唔組黨唔得咁款。但發叔唔係話只係構思點整合鄉議局為參選部署咩？林偉強就話，可能發叔做事一向小心，所以先咁講啫。不過，佢都話到明，根據《鄉議局條例》第一○九七章規限，鄉議局係唔可以組黨嘅，所以佢哋唔會用鄉議局呢個名去做，但相信鄉事派會組黨，而未來嘅黨員都一定會係鄉議局成員喎！
有節目參加者問到，點解鄉議局唔加盟其他特別大、又一直有合作開嘅政黨，而要自己組黨呢？林偉強就話結盟等於寄人籬下，做起事上嚟冇咁直接，仲坦言「萬事起頭難」，任何政黨都係由零開始，但係無論選舉結果係點，佢哋都要先踏出第一步，喺一五年區議會選舉。嘗試以政黨參選，總之周五舉行嘅集思會就會傾，而組黨係事在必行咁話。其實由零開始真係得嘅話，之前就唔會失敗啦！
