蘭桂坊有名你叫爛鬼坊，梗係名不虛傳喇。燈紅酒綠之下，「非洲兵團」、「南亞兵團」肆虐，販毒、賣淫、打交無惡不作，藏污納垢，鬼影幢幢，簡直係妖氣沖天嘅人間妖域。
呢，警方尋日凌晨採取掃蕩行動，喺中環蘭桂坊拘捕一個西非籍毒品拆家，檢獲價值不菲嘅可卡因。警方發現，犯罪集團已經轉換花招，用「埋雷」手法交易。即係咁，毒販將毒品藏喺附近橫巷嘅暗角，然後喺區內酒吧同娛樂場所「兜客」，客仔自己「攞貨」，警方防不勝防。加上「非洲兵團」毒販全部係自己友，臥底難以埋身，增加咗破案難度。
道高一尺，魔高一丈，犯罪分子不斷變招，睇嚟警察叔叔真係要打醒十二分精神，見招拆招至得咯。不過，淨係咁都未夠㗎 ，有樣嘢當局一定要即刻去做，就係堵塞漏洞嘞。嗱，呢次落網嘅西非籍拆家早前以酷刑聲請為由滯留香港，完全係因為當局「寬宏大量」，至可以做起販毒「生意」搵食咋。
叮！開門揖盜，愚不可及。本報曾經連日報道，蘭桂坊早就淪為非洲幫及南亞黨插旗搵食嘅地盤，直指問題癥結係港府難民政策不合時宜，弊在當局闊佬懶理，關人個關，犯罪集團咪更加有恃無恐囉。
本港難民政策有空子可鑽，唔係亂噏o架。早喺○九年，高等法院裁定二十幾名持「行街紙」嘅南亞裔人士可在港合法打工，引起輿論嘩然。社會各界當時已經質疑司法機構獨斷專行，罔顧公眾利益，要求當局主動收緊行政安排，即時遣返呢類假難民，但港府到依家乜都冇做過，簡直係助紂為虐。
港產官僚假仁假義，中門大開，香港唔變成無掩雞籠都難。各地難民不絕湧入，前排有數字顯示，入境處接獲嘅酷刑聲請累積多達一萬二千幾宗，超過五千人滯留香港，當中唔少係來港淘金嘅「經濟難民」。呢班人將蘭桂坊、尖沙咀等地作為搵食地盤，黃賭毒黑瓣瓣都掂，搞到區內烏煙瘴氣。有律師指，應簡化酷刑聲請程序，加快處理，以免申請人有機可乘，延長逗留。
掃帚不到，灰塵照例不會自己跑掉。港府難民政策千瘡百孔，搞到老蘭藏污納垢；警方執法甩甩漏漏，導致區內「五鬼出洞」，橫行無忌。計太一叮話齋，家陣正義傳媒發揮第四權功能，為民發聲，用陽光照亮黑暗角落，令妖孽無所遁形，如果當局再唔做嘢，唔止旅遊業呢條經濟支柱危危乎，遲早成個香港都變人間妖域嘅咋，叮！
第一手消息請下載on.cc東網
