「少膽虫，你死o架！咁遲先返！」少膽虫未入公司，就聽到淫賤黎咆哮。「腦細，我都唔想，地下火車又壞，一早叫佢哋咪用強國貨喇。」不過淫賤黎唔理少膽虫繼續大叫，「條嘢揈吓揈吓，唔係好掂！」「腦細，條條揈咁大鑊？等我睇吓！」點知護主心切嘅少膽虫一入《爛果》編輯部，就畀淫賤黎摑咗一巴，「你就條條揈！」呢個時候，少膽虫先發現《爛果》一片漆黑，「乜公司好唔掂，無錢交電費咩？」

「仲好講，公司黑咗咁耐，死吓死吓……」少膽虫為免再捱打，即刻轉移話題，「公司究竟發生咩事？」淫賤黎續道︰「應該係條電線斷咗，明明上星期先叫你買過啲新嘅，唔通你學地下火車咁用強國嘢？」淫賤黎雙眼不停打量少膽虫。「無可能，腦細雖然你畀我得嗰一個幾毫，但我堅持買歐洲牌子！」淫賤黎愈聽愈懷疑，「歐洲嘢？你喺邊度買o架？」少膽虫一臉自信︰「上『塗寶』買嘅，你睇吓真係寫住『Made In 歐洲』……」未講完，淫賤黎已經攞住一束電線，猛鞭少膽虫，「腦細，歐洲牌子喎，咁都打？」

「喺強國買嘅歐洲牌子咪又即係強國貨！仲要蠢到連網站都上錯山寨嘅、中英夾雜你都信，唔鞭唔得喇！」

第一手消息請下載on.cc東網iPhone/iPad/Android/Windows Phone Apps