SUN奇古怪：SUN潮語：【虎媽】
潮語「虎媽」泛指一啲逼仔女太緊嘅阿媽，希望仔女贏在起跑線上，成為人中龍鳳，將來出人頭地、揚名立萬振家聲。「虎媽」喺華語地區近年較為通用，喺香港「虎媽」又叫「怪獸家長」，其實係英文Monster Parent直譯。無論「虎媽」定「怪獸家長」都會強迫仔女上好多興趣班補習班，更會強迫小朋友學業非常出眾，甚至用到非常手段，不顧仔女感受，總之求學就是求分數，入名校文武十八般武藝樣樣皆精就係王道，令小朋友本來快樂嘅童年，變成好似強國訓練運動員，慘無人道。
冰雪運動基本上唔係香港人杯茶。依家喺俄羅斯舉行緊嘅冬季奧運會，香港人反應冷淡係預咗，如果唔係爆出「冇隊醫」呢單醜聞，冬奧會可能就好似盂蘭節啲神功戲一樣，搵鬼睇。但同樣係熱到爆炸嘅泰國，就出咗一位女滑雪運動員，個名叫做陳美，仲攞到唔錯嘅成績。呢位陳美，原來係國際知名嘅華裔小提琴家Vannessa Mae！乜滑雪加小提琴有得諗咩？呢件事背後大有文章，亦帶出一個「虎媽失女」嘅傷感故事。
Vannessa Mae陳美嘅媽媽，就係一個「虎媽」，自從陳美幾歲開始就逼佢苦學苦練小提琴，每日除讀書之外，就係練琴，後來陳美終於成為一個出色嘅小提琴家，但係根本陳美原來係極不開心，佢一直只係演緊一個做女兒嘅角色，完全沒有自己，佢自細鍾意滑雪，希望可以成為運動員。於是後來，佢冇再搵阿媽做經理人，走去滑雪。母女兩人從此各走各路，相見不相認。「虎媽」從此連女都冇埋。查實，咁又何苦呢？
