SUN MONEY：海嘯六周年Fund勝負

雷曼破產乃引發金融海嘯的元兇，更因而令全球股市大冧。

今日是金融海嘯六周年，縱使事過境遷，惟每次提起次按危機，你又會否猶有餘悸？當年環球股市齊齊插水，以致人心惶惶，惟翌年驚現報復性反彈，令不少人錯失投資良機，今期就請來兩位基金經理分享他們在金融海嘯時期的得與失，細訴箇中的愛與恨。

李紹劍金融海嘯後投資態度更審慎，要勝算高才落盤。

陳惠仁稱，海嘯令他有鍛煉心理質素及成長的機會。

中移股價曾低見五十元，但近日曾重返「紅底股」。

市差失業靠炒樓賺大錢

二○○八金融海嘯前，對沖基金公司思博資本基金經理李紹劍（Andy）於大型美資投行香港分部工作，管理內部對沖基金，嘯後該行於當年年底結束整個相關部門，使他頓時失業。惟他回憶起往事時卻說：「做得投行就食得鹹魚抵得渴，在好景時收得大額花紅，就預咗市道差會冇嘢做，nothing you can do（你沒能力改變事實）﹗」

雷曼破產後，環球股市暴跌，他指，「即使你估中方向，short咗AIG，一旦當時政府冇出手打救佢而令佢倒閉，都冇人賠到畀你，所以當時投行士氣好低落，我有朋友怕銀行執笠，索性將全部現金提走。」

投資要勇勿情緒化

值得慶幸的是，他當年所管理的投行內部對沖基金僅虧蝕數個百分點，翌年初更跳槽至另一間金融機構從事對沖基金管理工作。另因應證監會要求，他個人當時未能投資股票，故在○七年，購買三套中半山物業作投資用途，並於一二年沽出，隨後轉戰觀塘及黃竹坑工商廈物業市場，回報亮麗。

Andy投身金融界近十九年，曾經歷金融市場不少風浪。「我從中得到教訓，投資會更審慎，要勝算高先落盤，並尋求平穩回報。如果買入股份後，股價唔郁或者跌，認定係Timing（時間選擇）或分析唔啱，我就會認錯即沽；如果買入股份升，我會一路喺Target Range內加注。再者，做呢行絕對唔可以情緒化，要be a fighter（做一個戰士），唔係一隻股份輸咗錢就以後唔掂佢。」

他認為，嘯後各國央行出手救市干擾市場，股市因而變得動盪，分析股市就如上宏觀經濟課，須注視環球幣策。「我們要隨市場改變，投資較以往保守，環球股市的壞事全都影響港股市場，但好嘢又唔見會帶挈吓，所以近年投資組合的轉換頻率密咗，賺錢辛苦過以前好多。」

捧國策股揀比亞迪

在○九年港股低谷入市，買入多隻濠賭股及內房股，屬他當年最滿意的投資決定。他笑言：「不過，我喺批股份賺幅超過一倍就沽貨獲利，如果揸到依家就發達喇，其實都幾揼心﹗」

早前諾貝爾經濟學獎得主席勒以技術分析指，美股有崩盤先兆，他並不同意，又指出，美股的海外收入約四成來自歐洲，歐元匯價下跌或導致調整出現，有機會影響港股。然而，此等憂慮並未影響他的投資部署，主因思博資本旗下基金運用長短倉策略，着重選股，基金年內回報約15%，主力投資本港上市中資股。

他預期，中國GDP將均速增長，看好新經濟股前景，內地屬政策市，中長線看好國策股，特別是環保及國企改革概念股，心水愛股是比亞迪（01211）。

思博資本基金經理李紹劍

揸重現金救命輸少當贏

一向信奉價值投資法的Chartwell Capital創辦人兼首席投資總監陳惠仁（Ronald），旗下基金在○八年六月，即正值海嘯災難前開始接受客戶投資資本，猶如送他到死神面前。惟他說：「我當年六至十二月只係將約四成資產投入股市，仲揸住六成現金，其實『現金』救咗我，當時只輸約12至13%，跑贏恒指當年約五成的跌幅，○九年就賺至平手，好彩冇打輸呢一仗，我畀自己當時表現51分。」

中移累事勉強打和

要數令Ronald於海嘯時期最無奈的投資，可算是中移（00941）。「我喺當年八月中，九十幾蚊價位開始入貨，原本諗住佢由160蚊開始插落嚟，點估到佢可以跌到得返50蚊？雖然佢年尾上返八十蚊左右，帳面都輸十幾個百分比。之後我一直持貨，又喺約六十蚊加注，到近期佢返家鄉我就全數沽出，計入多年所收嘅股息先有錢賺，呢隻股真係令我受到極大心理創傷﹗」他苦笑道。

他對自己於○九年股市低谷的撈底表現亦感到悔恨。「當時國際名牌股真係平到不得了﹗我喺微軟（美股：MSFT）約23美元時掃貨，持貨至一二年33元時沽貨獲利，累計回報達43%。另可口可樂（KO）當時未拆股，我好想吼佢40美元樓下、分20日入貨，並建立佔5%資產的持倉，後來只得約9個交易日符合目標價位，因為想博佢回調，最終只入得2%資產貨，而面對Nike（NKE）都有近似情況，得6日符合目標價位，嗰陣好應該買得勇啲﹗」

經一事長一智，他表示，當年眼中的「價值」與今時今日相異，金融海嘯對他而言屬難得一見的機遇，令其有鍛煉心理質素及成長的機會，雖然市場資訊重要，但他奉行價值投資法，有時需要抽身。而各國政府救市先例一開，便不可單單分析股份價值，須了解政治、資金流向及觀察大勢，情況在亞洲區尤甚。