Fundman睇市：本地電訊股博得過

本周美國聯儲局議息，從債息的變化，似乎市場有心理準備，聯儲局主席耶倫可能會調整市場對息口向上的預期，預告一五年第一至第二季開始加息。上周歐盟理事會主席范龍佩，確認歐盟進一步制裁俄羅斯，除非俄羅斯於九月底前對烏克蘭的停火計劃能夠令歐盟滿意。

滬港通仍有憧憬

地緣政治的不明朗因素，加上美國退市可能比預期早，美元相對其他貨幣息差存在優勢，美匯指數連升兩個半月，上周見過84.53的十四個月新高，持續高位徘徊，上周五收84.24。

美匯轉強，意味掛鈎的港元兌非美元貨幣同步強勢。由歷史所見，這對港股向來不太有利，加埋近日流入港匯熱錢，確實有減弱迹象，恒指見25,326點海嘯後新高後，過去幾日市況氣氛逆轉之快，也實在出乎意料。大市已連跌六日，上周五跌67點收報24,595點。

唯一較為慶幸是，上周的跌市成交逐少縮減，基金沽貨的積極性其實唔算太強，事關個個芬佬心裏都仲有一絲盼望，阿爺會在十月滬港通正式開車前，炒起個市等今次港滬股市互通，開波唔好太過失禮。

月費計劃加得甘

上周五下午三點後，香港經濟似乎停頓咗兩三個鐘頭，身邊個個人攞住手機起勢咁refresh，為iPhone 6大抽獎遊戲瘋狂。查實同對手三星或內地手機企業，三分之一至一半價錢已買到同樣規格手機，偏偏蘋果公司就有一股獨特吸引力，叫人邊罵邊買。

隨住替蘋果供應零部件及手機組裝的瑞聲科技（02018）及富智康（02038）等，在新機發布前，股價已經開始有鳥獸散迹象，估計基金經理都趁好消息出盡派貨。對於股市投資者而言，iPhone 6的相關古仔係咪就咁玩完，咁又未必。

上星期iPhone 6開始預訂之後，本地電訊商陸續公布跟機上台價，社交網站的討論可謂一面倒，大都高呼電訊商住搶！個人實例，用400元左右的無限上網已經取消，如果轉用新出10Gb上台月費計劃，每個月月費加到貼近700元，大升七成多！

話就話今次iPhone 6加咗價，手機補貼金額高咗，但用excel計一計，減去補貼的實際月費，幾個電訊公司統統加幅唔細，仲未計每月用近20Gb數據，如在下一類的高用量用戶，埋單額外每Gb畀錢的一班待屠肥羊。

本來CSL被收購，預咗香港電訊市場會逐漸回到寡頭壟斷的局面，只係想唔到會快殺到埋身，周末搵埋美國AT&T及VeriZon兩間蘋果公司合作電訊商的買機上台價比對，以前香港平過美國的情況不復再，更加證實想法無錯。睇落上半年業績示人以弱的數碼通（00315）及和電香港（00215），在iPhone 6狂熱，低頭族又行唔返轉頭，業績應該見咗底 。