Fundman睇市：安踏體育分注買貨

尋日港股表現之強，連睇好後市的筆者都感到有些少意外，一來近半個月大市成交都只停留在六、七百億水平，與恒指表現比較相形見絀。另一個寒暑表港元匯價，上星期開始由7.75的強方兌換保證水平，輕微回順十至廿點子，反映資金湧港情況稍稍不及前時。

再睇外圍，港股獨強的情況就更明顯，俄烏、加沙等地緣政治局勢不穩下，近期見資金流出風險資產，十年美債息跌至2.4厘附近的一年新低，反映唔明朗揸現金之外，美國的經濟復甦大道是否想像中的平坦，券商骨子裏取態頗為悲觀。雖然現時中港股市估值的確處於歷史偏低的水平，但要小心萬一外圍股市震盪，已經累積唔少升幅的大型股份，會有一次顯著回吐。

騰訊升浪未見頂

收市後，騰訊（00700）公布中期業績，半年賺122.93億元（人民幣．下同），按年升59%。單以第二季計，賺58.36億元，升59%，破埋分析員48.5億至58億元的預測上限，按業績前大行預測全年233.6億元盈利計，半年已完成52.6%，相信新一輪「鬥癲」的業績再重估，可能令炒風火上加油。

對筆者而言，騰訊確實是一隻好難給予投資建議的股票，今浪從五月的93.1元（港元．下同）起步，去到尋日133.2元，累積升幅達43%，雖然一四年PE講緊40.9倍，比五年平均35.3倍高一成五，可是基金經理不離不棄，一來大市值兼好炒的股份已經賣少見少，尤其對沖基金鍾意炒佢完全同估值無關，唔少都純粹賭阿里巴巴上市前內地科網股的水漲船高效應。姑勿論點，睇怕今浪仲有條件改寫歷史高位，不過對大部分保守而不貼市的股民而言，其值博率同風險唔成正比。

體品股一枝獨秀

內地七月零售總額按年升12.2%，比市場預期差，前五十大百貨銷貨值七月份按年更跌2.1%。與○八、○九年輝煌年代，中國零售總額按年升幅在兩成以上比較，中央反貪腐及經濟放緩，對內地零售業負面影響，顯然是未見黎明前的盡頭。不過凡事都有例外，好似更早進入寒冬，齊齊縮減舖面兼清存貨的體育用品股，就算係零售板塊奇葩，其中早幾日出中績表前已炒定先的安踏（02020），昨股價見15.34元的三年幾新高。

安踏半年收入及純利分別升22.4%及28.3%，至41.2億及8.03億元人民幣，以高單位數接單增幅，全年業績交出16億元人民幣樓上，問題應該唔大，18.5倍PE，以21至22%盈利增長，加埋4厘股息，年初至今升近六成，感覺都仲係可以接受，唯獨近期股價愈升成交愈縮，中長線捧場客，或者可以選擇等等或者分注去買。