尋日港股又係尾市先發圍，恒指早段在24,600點水平反覆，尾市止跌回升，收市前兩分鐘買盤積極掃入騰訊（00700）及中移（00941），結果恒指收報24,890點，升200點，創三年多收市新高。收市後騰訊公布次季盈利達市場預期上限，看來恒指今浪一舉突破25,000點關的機會頗大。

上半年內地風電利用小時下降，但已在風電股估值上反映。（資料圖片）

內地七月新增人民幣貸款僅3,852億人仔，較市場預期少咗一半，同月社會融資規模僅2,731億人仔，同比減少5,460億元人仔，這與近期普遍回穩的經濟數據所顯示的景象有點出入。不過，暫毋須因此而過份憂慮，內地經濟回穩向好的趨勢未有因此而改變。反而，這顯示未來數月尚有可觀空間推出刺激政策，而在七月份的低基數之下，八月份數字按月將會有明顯的升幅。故見尋日A股反應亦不大，滬綜指升1.2點，收報2,222點。

股仔熱炒有玄機

回說港股，尋日二、三線交投暢旺。若看官仔細翻閱資料，近呢兩個月唔少靜咗好幾年的股仔都異軍突起，且人氣不俗，例如中航國際（00161）、財訊（00205）、開達（00180）、協盛（00707）等。呢類股仔異動，不一定係賣殼，只係依家主板殼價真係升咗唔少，呢批股仔市帳率低兼且長期交投淡靜貨源疏落，吸引一批炒家逐一燒冷灶。再講，預期十月滬港通開始，多咗專門聽消息炒股的內地個人投資者參與港股。魚缸有新水，幾億銀市值的股仔，計落流通股份市值實在唔多，本地炒家自必把握市場氣氛大炒一番，到時熱鬧場面值得期待。

指數高企，資金繼續遊走於不同板塊之間，好似尋日就輪到新能源股有起色，順風光電（01165）以大成交升8%；華能新能源（00958）中績勝預期股價升7%；大唐新能源（01798）及華電福新（00816）分別升4%及2%。捕捉資金動向，可以睇實相對強勢的華能新能源。

上半年內地風電利用小時下降，影響電企收益，但這因素已反映在估值上。華新能中期純利同比增2.9%至6.86億元人仔，表現勝預期，主要是成本控制得宜。據聞今日公司會有分析員會議，若在業務展望方面的訊息正面，應有利股價氣氛。

尋日該股平均成交價接近2.8元，且成交配合，10日線升穿50日線，若板塊氣氛配合，是浪目標上試3至3.2元阻力區，支持位可參考10日線2.65元。