內地個人遊大減，加上消費力下降，鐘錶及珠寶店開到密集嘅核心區零售商舖首當其衝，租金走勢向下，但主攻藥房、化妝品店等嘅新界區商舖就未受影響。好似元朗區舖位租金持續上漲，有區內經營超過三十年嘅食肆話，青山公路舖租「基本上已經係市區價」，事實上區內有二線街舖租金加幅更高近1.4倍，等同甚至勁過以往嘅尖沙咀及旺角區。

近年元朗大馬路兩邊至少新增十數間藥房同化妝品店，舖租被搶高。

元朗商戶及遊客心聲
租金必升
粉麵店胡先生預期，元朗區大型商場落成之後，區內舖位租金必然會上升。

元朗較抵
內地客張小姐表示，現時到元朗購物所需的車費，較本港其他地區會更便宜。

元朗區商舖租金變幅情況

美聯（01200）董事總經理黃子華同劉Sir講，近年個人遊消費模式由高消費品轉為生活用品，所以核心區售賣貴價奢侈品嘅商舖將直接受影響，好似鐘錶同珠寶行業；新界西北嘅元朗區，個人遊人數下跌並不多，街舖主要為民生商店如藥房等，故對該區商舖未有影響。

大馬路呎租高見200

喺青山公路元朗段（俗稱大馬路）貼鄰谷亭街經營粉麵店多年嘅胡先生話，近三、四年大馬路兩邊至少新增十數間藥房同化妝品店，舖租被搶高。

胡先生又話，現時大馬路嘅舖租同市區無分別，以一個面積約900方呎街舖為例，租金至少15至20萬元，呎租160多至200多元，同區二線街同類型街舖租金亦要約12萬元。

佢同劉Sir講，設於康樂街嘅分店，三年前訂下嘅租金9萬元，依家續租金大幅調升到15萬元，加幅高達67%，由於不敵加租，最後決定放棄間分店。事實上，間舖食品售價遠遠追唔上租金加幅，佢話十年前一碗牛丸賣20元，依家雖然升到30元，但係升幅都只約50%，仍遠低於租金上升速度。

業主加1.4倍 雜貨焗執

佢又話，區內有一間做咗逾三十年嘅雜貨舖亦將結業，其租金由6萬加至10.5萬元，加幅高達75%。事實上，區內二線街舖租金升幅更驚人，其中福德街雙號地舖，租金由3.8萬加至9萬元，較舊租勁升1.37倍。

元朗區未來前景亦可睇高一線，據了解，新地（00016）有意待YOHO三期商場落成後，將YOHO MIDTOWN商場及翻新後嘅新元朗中心商場串連，建立總樓面約百萬方呎嘅巨型商場圈。

美聯區域營業董事倪金河相信，區內商場落成後，街舖呎租可將進一步上升10至20%，依家區內一線街舖平均呎租約200元。