Fundman睇市：券商股 強勢可持續

如果聯儲局未來每次開會減少買債100億美元，到明年底就會完全撤離QE，但下月開始揸弗人係耶倫，可能又要重新估算。

收水既然係遲早的事，所以聯儲局早日收水反而令大家唔使心中再有條刺，美股延續不死神話，更令投資者開心係將加息同通脹掛鈎，只要美國通脹不高於2.5%，即係有排都唔會加息。不過，通脹呢樣嘢唔係咁易控制，美國近年通脹咁低，頁岩氣掀動的能源革命功不可沒，但經濟好及就業理想自然會帶動通脹，所以市場不能因為現在通脹低，就一廂情願認為兩年內都不會加息。無論如何，市場已幻想息口有排低企，同美國樓市息息相關之創科（00669）因而成為逆市奇葩。

除美股之外，日股亦創6年收市高位，只有中港股市同聲一哭。投資者總喜歡事後找理由，有人認為資金由香港游回美國，信邪的則將責任賴落「地獄黑仔王」光大銀行（06818）身上，但睇見上海一個月銀行同業拆息升至7厘樓上，已毋須太多藉口，半年前之錢荒夢魘又再重現，人行繼續作壁上觀不進行逆回購操作，唔通又想睇吓邊個裸泳乎？

錢荒夢魘又再重現

之前聯儲局係最大造市者，現在輪到人行，但亦令港股更為撲朔迷離，人行隨時可以再放水令拆息回落，領導人亦早有「底線論」，收市後人行表示已運用短期流動性調節工具（SLO）適度注入資金，似屬安撫作用多過實際行動，人行收放時機變幻莫測，比聯儲局更難估計。

A股早段曾經回升，但滬綜指最後仍是8連跌，A股如無意外將蟬聯今年全球最差主要市場的「榮銜」，下個月開始IPO重啟是好事抑或壞事暫難估計，惟港股年尾呢幾個交易日肯定不得安穩。恒指及國指昨分別跌255點及183點，成交743億元，期指成交8.3萬張，接近前日之兩倍，沽空金額連續第4日超過一成，論技術走勢固然惡劣，10日線即將跌穿50日線，250日線22,586點及上月低位22,463點亦相去不遠，但只要阿爺一聲放水又可一天都光晒。昨日共殺咗77隻牛熊證，包括有45隻恒指牛證及16隻恒指熊證，再殺到250日線近就可將牛證重貨區一舉殲滅。

展望明年，內地金融業將進行較大型的改革，年頭A股重啟IPO將會是頭炮，接着係逐步推動利率市場化、人民幣國際化，以及放寬資本控制。故雖然內銀股仍要面對地方債高風險的問題，但圍繞行業仍不乏重大改革消息，板塊會有一定的上落波幅可供炒作。

相對而言，券商股會係較明確可受益於金融業改革的板塊。本月以來，恒指由24,100點水平回落至昨日低位22,753點，但期間中信証券（06030）及海通證券（06837）股價沽壓不大，足見強勢，建議逢低收集，中長線可望財息兼收！