港股尋日食「彈散」，恒指由升260點至最多倒跌390點，結果收場唔見255點，全日高低波幅達651點。技術上，恒指上周四失守50日線後一直未能收復，若短線10日線插穿50日線，將確認走勢向下，則後市極有可能要下試250日線22,586點支持。反觀新股市場未受跌市影響，熱鬧非常，福壽園（01448）膺新股王，真係百無禁忌！繼續玩半新股的話，其實中國信達（01359）都幾唔錯，4.5元樓下可以伸出友誼之手分注收集。

美國正式揭開退市序幕，未來利率勢將步入上升周期，對中國建材之類的高負債企業不利。（資料圖片）

阿莊100萬元投資組合

尋日提及的中石化冠德（00934）如期受制於8.3元水平而掉頭回落，就按計劃等7.5元水平再作部署。呢期節能環保股個別發展，風電、水務、光伏排隊輪流炒，係反映魚缸內炒作資金唔多，一注錢無法兼顧三瓣，抑或可供長炒長有的概念唔多，就輪流舞上舞落炒波幅？無論如何，阿莊堅信，節能環保係國家政策，未來兩年將步入「十二五」的後半截，新領導層有必要加快推動相關政策，以期能實現「十二五」的各項目標，明年呢個板塊展望依然審慎樂觀。

息口敏感股受衝擊

美國啟動退市，顯示當地經濟復甦進度理想，加上退市步伐溫和，前晚美股高收係合理。至於中港魚缸尋日低收亦不意外，皆因預期未來息口走勢將有改變，尤其係本地息口敏感股份首當其衝，市場須要時間消化。本地地產股普遍低收，其中恒隆地產（00101）跌幅最大，達4.5%，但奇怪嘅係專門做地產代理的美聯集團（01200）反而高收2.4%，市場解讀為落實退市反可去除不明朗因素，買賣雙方更易盤算，有利樓市交投，係真唔係，姑且等着瞧！

另一方面，美退市將推升美元及美債收益率，從而推升內地利率及人民幣實際有效匯率，內地市場流動性及出口需求勢受影響。究竟中央如何拆招，仍有待觀察。尋日Shibor繼續抽升，咁嘅環境下，其實呢幾日A股跌勢都算溫和。嚟緊A股關鍵乃下月順利重啟IPO，只要魚缸重現活力，資產升值帶動財富效應，將有效推動內需，則有望抵銷外來因素的不利影響。

話說回來，正正由於內地市場流動性仍然偏緊，且利率預期趨升，故高負債股表現將受掣肘，典型例子有中國建材（03323），尋日股價由高位8.8元回落至8.28元，收報8.43元，跌2.99%。睇走勢，是浪反彈仍未能收復250日線，短線向下回試升軌支持7.7至7.8元水平機會大，有貨宜先行沽出，預期未來六個月股價仍會落後於同類股同跑輸大市。