魚缸Blogger：中國油氣動力十足

以氣代油係大方向，尋日中國油氣（00702）喺成交激增下，急升8.5%，以近全日高位0.255元收市，同一年高位0.27元相距不遠，加埋14日RSI（68）有上升動力，短炒目標睇0.28元。

中國油氣去年底同中石油集團合作嘅山西省三交區域煤層氣項目，已被列為「十二五」重點扶持項目之一，另現正考慮擴大金庄油田原油產量，同埋研究喺區內開發天然氣的可能性。睇番業績，公司今年上半年虧損縮至2,449萬元，而首三季原油銷售4,658萬噸，煤層氣產量3,334萬立方米，銷量2,054萬立方米，煤層氣產銷比率為61.6%，可見營運表現唔錯，盈利能力有望改善。

另外，發改委於七月上調非居民用上游天然氣價後，近日有指或快將推行居民階梯式氣價，八月公司就將非居民用、壓縮煤層氣井口價加咗21%，至每立方米0.32元及0.33元，相信消息屬正面。