政府前日公布下季賣地計劃，話鐵路項目仲有6,000伙等住推。說時遲那時快，港鐵（00066）旋即「做嘢」，今日重新推出天水圍輕鐵天榮站上蓋項目招收意向書，下周五截止。項目今年初曾因補地價問題而慘錄「零標書」，但港鐵就補價都幾難讓步，財團反應睇怕唔會太熱烈。

天水圍輕鐵天榮站上蓋項目，突然招收發展意向，下星期五截止。（資料圖片）

天水圍輕鐵天榮站上蓋項目資料

港鐵發言人尋晚打電話畀劉Sir，話上述天榮站項目會喺今日開始招收發展意向，下個星期五截止。

可建千五住宅

基本參數同上次流標時無乜分別，地盤面積約19.6萬方呎，住宅及商業樓面佔約98萬及0.2萬方呎，提供大概1,500個單位，預計二○二○年落成。不過，最新補地價詳情，則仍有待招標章程揭曉。

劉Sir都知道，鐵路項目往往因補地價傾唔掂數而增流標風險。好似呢個天榮站上蓋發展，今年初首次推出時，收到16份意向書，雖然截標嘅時候出現長實（00001）同埋新地（00016）「疑似入標」，最終港鐵喺二月中公布項目因為無收到任何標書而流標收場。

項目補地價有幾高其實有數得計，以年初嘅招標條款約26.863億元補地價金額計算，加埋約4.1億元入場費，樓面呎價超過3,100元。

屈指一算落成後開售呎價7,000元走唔甩，比起當時二手價足足高出四成，劉Sir係發展商都未必會投啦。

再較早前港鐵大圍站上蓋項目都係因為補價過高而流標，當時流失咗嘅2,900伙供應，估計會喺不久將來再次推出。

每呎估價2300

老友高緯環球張翹楚話，天水圍地價好難高得去邊，但係又好難低過坪洲等離島地區。天榮站上蓋項目牽涉分紅等因素，估計每方呎樓面地價大約2,300元，估值大約22.6億元。

佢仲話補地價問題港鐵幾難讓步，加上天水圍區屋苑係長實嘅主場，其他財團未必有意欲爭取，料競投氣氛未必會好熱烈。