Fundman睇市：網遊新股 再度落鑊

聯邦政府拉閘影響第四季經濟，聯儲局大條道理將退市押後到明年伯南克御任至算。彭博最新調查，大部分預測退市去到明年三月至開始，同上月調查主流預期今年十二月，睇法好唔同，美股屢創新高，聯匯制度下港元由六月低位回升，絕非無的放矢，熱錢有重回風險資產的趨勢。照咁睇，港股短期應該唔衰得去邊。

內銀或有影子效應

尋日聽到兩隻內銀新股徽商及重慶銀行，保薦行開始做緊前期工作，部分基金經理已經「見過」有關資料，估年底前上市。消息話目標定價，市帳率可能唔平得過現時幾隻中型內銀股。環顧目前內銀股投資氣氛唔算熱鬧，最引人入勝係用乜古仔去sale？萬一真係影子股適時發威的話，值得（目及）實的，應該係民行（01988）及招行（03968）。

隻騰訊夠晒癲，裂口見歷史高位455元，計落市值8,458億，在全球上市公司市值排名中去到六十一位，響香港排第七，僅次於中石油（00857）、工（01398）建（00939）中（03988）三大行、中移（00941）及滙控（00005）。值得留意的是，中行市值1萬億，不過大騰訊18%，然而去年業績賺1,455億人仔，足足多騰訊11.3倍。無他嘅，市場對互聯網及銀行業的前景睇法兩極化，估值也有云泥之別，一隻51.6倍，一隻得5.8倍，如果按大行預測騰訊今、明兩年增長27.4%及26.1%，一四年PE講緊32倍，肯定唔平，但亦不至於好離譜，難怪五百、一千的目標價，被口痕友當成口頭禪。

騰訊效應下，兩隻半新股雲遊（00484）及IGG（08002）抖完氣之後雙雙起舞，分別升6.1%及11%，收報65.25及3.42元；雲遊主攻網頁遊戲開發，以網頁遊戲淨收入計，去年在內地排名首位，市佔率24%，觀察到其策略係漁翁撒網式，每年推出大量遊戲，博幾隻作品成功跑出受玩家歡迎，上市集資目的係雙線發展，投放更多資源在手機遊戲上。

以新加坡為基地的IGG，同已經擁有兩年賺錢紀錄的雲遊最大分別，是尚未達到收支平衡。公司開發多種語言網頁、客戶端及手機遊戲，同樣地，大部分遊戲可以免費下載，再透過向玩家出售虛擬貨幣提升遊戲體驗取得收益。

論班底，雲遊保薦行大摩及摩通，大額超購但就未以上限定價，預水位畀唔夠貨的基金上市後在街外掃貨。反之光大保薦的IGG，全配售上市，過去兩日成交相對市值的比例均高於雲遊，炒味較濃。結合往績，純搭順風車的話，雲遊可以秤高啲啲，如果增長可以維持到今年上半年的幅度，估值為18倍左右，儘管網遊股估值向來都有點折讓，但同天價網股比較，看來仍是比較容易接受。