工商舖市場愈來愈靜,唔少投資者都主動減價,務求盡快出貨。紀惠集團廖偉麟啱啱減價約16%,賣咗舊年被棄購嘅尖沙咀H8銀座式商廈23樓頂層連天台,成交價約3,580萬元,比當時原先摸出價低670萬元,減幅16%。另外,佢亦趁淡季前,減租約10%租出上環信德中心東翼極高層兩個寫字樓單位,呎租約39元,係兩年新低。

紀惠廖偉麟減價沽出尖沙咀H8全幢銀座式商廈的單位。(資料圖片)

廖偉麟

被棄購商用物業減價重售個案

全幢沽清 少賺千萬

投資者廖偉麟同劉Sir講,辣招後,工商舖買賣少咗好多,唔減番啲價,好難吸引買家入市。佢話,上述嘅H8商廈23樓頂層,面積約2,188方呎,連天台舊年底以4,250萬元摸出,其後買家提出取消交易,今年初曾推出重售,意向價約4,000萬元,惟市況差,近排減過幾次叫價,終於拍板以3,580萬元售出,呎價約1.64萬元,同之前做價低咗670萬元,減幅約16%。

由於之前該廈低層都減價約13%重售,涉資約4,988萬元,全幢售罄後,帳面袋約1.8億元,同原先計數少賺約1,000萬元。廖生舊年十二月以7億元,向資本策略地產購入H8全幢,之後分拆出售,樓上呎價由約1.4萬至1.6萬多元。

有代理話,廖生都租出信德中心東翼極高層單位,面積約3,647方呎,月租約14萬多元,呎租約39元,同原先嗌緊40幾元,低咗10%,租金回報率逾2.7厘。

英皇道舖1.6億易手

近排市況麻麻,舖位業主加租幅度克制咗。聽講銅鑼灣白沙道單號一個連鎖個人護理店租用嘅地舖,早前傾續租,雙方傾到尾聲,有人打聽到新租金每月約50萬元,租金升幅只係30%。至於早排有財團暗標放售嘅鰂魚涌英皇道單號地舖,啱啱以約1.6億元賣出,個舖面積約1,900方呎,呎價約8.4萬元。

根據土地註冊處資料,荃灣德士古道工廈寶業大廈部分天台樓面,今個月只係以70萬元賣出,依家咁嘅價錢,連一個車位都買唔到啦。