上星期標普五百指數再創新高，港股跟外圍做好，昨恒指裂口高開23,494點，比上周升154點，之後一度去到23,534點，同九月十九日高位23,554點僅差20點距離，十點後升勢膠着，到歐股開市，在期指主動沽盤帶動下，現貨曾經跌至23,356點，收市升98點，報23,438點，主板成交稍為少過上周五，得602億元。

恒指期貨走勢2013/10/21

值得留意是升勢高度集中在一隻騰訊（00700）身上，貢獻大市63點，佔恒指升幅六成四。

即月期指昨日高位見過23,530點，愈近重要阻力23,600點，壓力愈大，期指以23,401點收市，低於全日成交密集區23,470至23,530點，以及全日加權平均成交價23,436點，多少見到淡友開始有反抗之力。

始終大市一日未升穿23,554點或者跌穿22,743點的中期上落區阻力，橫行上落形態可能仲未玩完，與其炒即市無所是事，倒不如睇吓炒得火熱的藥股及科網板塊好過。