承接美股升勢，科網股領軍加埋濠賭股上衝，帶動港股走強，恒指一度抽上23,534點，午後現回吐，收報23,438點，升98點，大市成交602億元，騰訊（00700）股價再創新高，貢獻恒指63點升幅。由於輪證成交未有明顯增加，某程度反映現貨成交確實有所上升，好淡爭持漸趨激烈，後市能否更上層樓，其中一個關鍵乃大市成交會否持續增加，以確認是否有新資金流入。

內地加大力度扶持新能源產業，比亞迪自然可以受惠，難怪股價強勢畢呈。（資料圖片）

阿莊繼續奉行炒股唔炒市策略，當炒板塊有新能源同電訊設備股，好似阿莊組合中的龍源電力（00916）同中興通訊（00763），都係強勢之選，尋日同創五十二周新高。其他板塊方面，本月十一日推介過的復星醫藥（02196）強勢超乎想像，股價由一周前14元唔到，升到上尋日高位見19.5元，有跟進真係幾和味，而環顧整個醫藥板塊，其實氣氛都唔差，且看剛買入的石藥集團（01093）幾時開快車！

中鋁基本因素改善

中國鋁業（02600）上周宣布，向母公司出售中鋁鐵礦65%股權連銀行貸款，代價約20億美元。阿莊聽聞，圍繞中鋁的資產重組消息會陸續有來，也許經重組整合提升效益後，中鋁將可朝轉盈目標進發，小股東自然樂觀其成，大行對此亦看法正面，其中渣打剛剛便將中鋁的投資評級調高至「跑贏大市」。

再睇其股價走勢，六月開始緩步走出谷底，自2.2元水平反覆回升，尋日成交增至1.08億元，收報2.94元，升3.8%，250日線阻力處3.08元。若然想搵冷門股，基本因素正在改善的中鋁，屬值博之選，小注怡情，升穿3.08元，下一阻力位在3.3元水平，主要支持在2.75元。

強勢股比亞迪股份（01211）尋日曾高見41元，收報40.85元，升幅3.8%，成交2.14億元，乃一一年一月下旬以來首次重上40元關收市。仲記得八月下旬時，呢隻股曾進行大震倉，當時阿莊都話可以撈底，偏偏落唔到心儀買入價冇跟進，結果睇住隻股絕塵而去。

在內地加大力度扶持新能源產業之下，未來新能源汽車發展前景樂觀，比亞迪可受惠各種扶持政策，而今年的業績亦會有改善，此乃大戶一直買上的底因。股價走勢方面，圓底回升動力增強，年底前有政策消息配合的話，有望挑戰半百元大關，留意短線回吐守穩37元水平樓上，仍可考慮趕上車。