美股無因為危機解除而上升，美匯亦無因為咁而反彈，因為下一個投資主題又去番「退市」問題上。事實上，政府關門超過兩個星期，好多經濟數據都睇唔到，亦都係令聯儲局唔敢貿然退市嘅最佳藉口，所以十月退市可以話係「不可能的任務」。

澳元兑美元走勢

至於十二月中能否應伯南克希望的在「年底前」退市，就要有更多證據睇到出年經濟仍然光明，同埋十一月嘅數據比九月好。九月非農就業數據今日公布，可睇睇就業市場情況係點。

美國十年債息由2.75厘跌番去2.6厘，反映聯儲局要開始退市嘅機會率降低咗，同時令到美金吸引力下降。各大貨幣基金近幾個星期就不斷出售短期美國國債，令短債息出現飆升。

美國政客玩嘢，或影響美國經濟增長，背後嘅代價就係美元嘅吸引力下降，睇睇連炒避險情緒都炒唔起嘅金價，單日都急升3.2%至1,322美元，而一眾外幣亦借勢反彈。

美元要反彈都仲要時間，不過睇番價位，澳元由八月0.88水平反彈，已經到達筆者目標價0.9650，重返1算機會仍然相當微，雖然要逆市做淡係需要勇氣，不過調整仍勢在必行，就算唔敢沽都唔建議再高追，建議0.9680開盤博澳元調整，首站目標0.9480，止蝕0.9780。