魚缸Blogger：中興通訊目標20元

自從同咗NBA品牌合作，中興通訊（00763）股價唔識停咁，除突破頸線阻力15.6元外，亦屢次破頂，尋日收報18.16元，即市創出18.34元的五十二周新高，14日RSI未算超買，短線守住喺20日線16.73元樓上的話，跟炒上望20元。

雖然中興去年虧損28億元（人民幣．下同），不過今年上半年扭虧為盈，錄得純利3.1億元，去年同期則賺2.44億元，毛利率亦由24.6%升至25.7%，反映公司受惠今年電訊運營商揼本建設網絡。在「寬帶中國」戰略下，今年頭九個月全國電訊主營業務收入8,708.8億元，按年增幅8.6%，而且4G發牌在即，各大運營商積極展開設備招標工作，中興有機會做大贏家。上周就有消息指中國電信（00728）接近一半4G工程已被中興奪得，而佢亦都拎咗中國移動（00941）100G光傳輸網絡超過60%合約，加埋公司手機喺美國嘅市佔率有番咁上下，股價仲有上升空間。

中興通訊（00763）