港產官僚最叻吹水唔抹嘴，早前提出喺地區設立露天市場同夜市，眨吓眼過咗個幾月，到依家仲係無聲無息。既然官老爺唔嗲唔吊，民間咪惟有主動出擊囉。
呢，多個團體建議推動各區墟市計劃時，採用社區主導模式，盡可能納入當區不同持份者嘅意見；又建議各區區議會成立工作小組，搜集居民對墟市選址及營運時間、方式等意見，再整理成報告，交由區議會同政府落實同執行。團體仲話，之前深水埗區議會曾委託社區組織進行墟市研究，證明地區主導模式係可行嘅。
係人都知，墟市曾經係本土經濟嘅重要組成部分，更加係港人嘅集體回憶。好似上環大笪地咁吖，有美食，有表演，商品又齊全，各適其適，不知幾咁熱鬧。其實唔使講咁遠，依家逢年過節，深水埗桂林街例必吸引大批地攤同熟食檔擺賣，一樣做到成行成市。
本來呢，桂林街夜市有聲有色，證明地區墟市有龐大需求，只要做好安置同規劃工作，確保衞生同安全，應該可以有一番作為，弊在港產官僚捉到鹿唔識脫角，一味趕盡殺絕，結果引發連番衝突，搞到滿城風雨，吹脹！
可能有人會話，隨着城市不斷進步，昔日流動小販退休嘅退休，上舖頭嘅上舖頭，加上衞生同交通等問題，墟市被淘汰在所難免。其實，世事無絕對，好多嘢事在人為嘅啫。睇吓台北，同香港一樣都係人煙稠密嘅大都市，但係一樣可以將夜市發展成聞名遐邇嘅旅遊景點，台北做得到，點解香港做唔到呢？
港府開口埋口發展本土經濟，可惜講就天下無敵，做就有心無力。亞洲金融風暴後，港府係威係勢，喺黃大仙搞咗個騰龍墟，結果得三分鐘熱度，好快就偃旗息鼓；幾年前天水圍天光墟搞得似模似樣，點知政府另覓地方設立天秀墟後，不足一年就慘淡收場。港產官僚化神奇為腐朽，食嘢唔做嘢，做嘢打爛嘢，問你服未!
話時話，港府最近提出引入外國流行嘅美食車，查實當中涉及發牌同交通等複雜問題，唔係短期內搞得成。反而發展地區墟市更有條件，使乜捨近求遠吖。
點講都好喇，地區墟市既可增加就業，亦可為市民提供好去處，更可增加旅遊景點，一舉多得，值得大力支持。如果真係由地區主導，話唔埋真係有成功機會o架，叮！
第一手消息請下載on.cc東網
