政壇：搞搞政：長毛再披甲苦撐一人黨
泛民政圈玩緊個前浪不及後浪激嘅遊戲，曾經被視為好激嘅社民連，家吓已被人力、熱血等冚過，加上一次又一次嘅內訌，搞到呢個成立咗八年嘅組織已經謝晒，面對種種危機，明年踏入花甲之年嘅主席梁國雄（長毛），分分鐘要再次披甲上陣，而且贏咗都只係延續一人黨嘅命運，真係苦苦撐持，都係得個吉。
設計圖片及對白
四將戰區選僅一新人
佔領行動後，新冒起嘅政團有如雨後春筍，唔少更打着激進、勇武嘅旗號，相比之下，社民連就大為失色，被人批唔夠激進、老餅，以致年輕人唔願意加入，新血不足下，個檔仍要由舊人頂上。好似年底嘅區議會選舉咁，據聞佢哋決定派出四人出選，當中三人更係過去選舉中屢敗屢戰，分別係計劃重奪柴灣樂康選區嘅「阿牛」曾健成、再戰灣仔樂活選區嘅前立法會衞生服務界議員麥國風，以及再戰沙田瀝源選區嘅社記副主席黃浩銘。至於唯一一位新人，就可能被派往九龍西選區參選。
一一年區議會選舉，社民連一鋪清袋，輸光所有議席，今次四人有幾高勝算，真係天知道。仲有明年嘅立法會選舉亦一樣，聽聞黨內冇乜人想競逐主席一職，換句話講，即係明年就六十歲嘅長毛可能要焗住連任多兩年主席。黨務要孭住，明年立法會選舉有傳長毛打算讓位畀黃浩銘，但長毛就唔多想排第二幫黃抬轎，因為佢經常批評泛民用抬轎呢招呃選民，如果佢唔排名單，個席位輸梗啦。所以話，社民連前景真係麻麻，一係長毛退休，個檔亦隨之玩完；一係長毛六十歲再次披甲上陣，但黨內更青黃不接。
