一個人聲稱受傷，連工都返唔到，正常嚟講，就算唔使入醫院，起碼都要留喺屋企休息。不過世事無絕對嘅，有人唔知係咪天生異稟，受傷唔使休息不特止，仲好打得添，真係唔到你唔服。
講緊嘅咪就係身為公務員兼港九拯溺員工會副主席嘅郭紹傑囉。大家應該記得，去年十一月佔中期間，有淫賤黎之稱嘅壹淫媒老闆黎智英坐鎮金鐘佔領區「私家皇座」抽水兼扮指揮，三名市民忍無可忍，衝前怒斥淫賤黎係「賣國賊」，有人跟住向佢淋屎尿掟豬雜，搞到佢冤崩爛臭，要幾狼狽有幾狼狽。
本來呢，對付豺狼用獵槍，對付漢奸用臭彈，市民替天行道，儆惡懲奸，係大快人心嘅事，點知郭紹傑同民主黨前西貢區議員柯耀林忠心護主，急急撲出來制服三名涉事者，上演咗一場大龍鳳。
講到呢度，大家一定會問，郭紹傑明明係康文署嘅救生員，點解會喺金鐘佔領區出現呢？原來郭紹傑前年九月起就以「跌斷鎖骨」為名，一直放緊工傷假，即係話，佢一邊出政府糧， 一邊佔中反政府，問你服未。咁都未算呀，最神奇係佢自稱有傷在身，但竟然擔任金鐘佔領區糾察長，變相做埋淫賤黎嘅「私人保鏢」添。你話嘞，跌斷鎖骨仲咁龍精虎猛，當中係咪有問題呢？當局係咪應該徹查有冇人騙取工傷假呢？不可不知，超過一年嘅有薪假，條數唔細，點可以就咁算數呢？
件事仲未完，郭紹傑及柯耀林早前被警方以涉嫌喺公眾地方打架拘捕，點知兩人玩「拒保」，日前仲收到警方通知不作檢控，反而叫佢哋轉做證人喎。咁都得？係人都知，佔中霸佔道路，擾亂社會秩序，打擊經濟同民生，係不折不扣嘅違法行為，如果話市民替天行道涉嫌違法，咁佔中搞手及幕後黑手直情罪加一等，當局是非不分，黑白顛倒，市民唔眼火爆就奇喇。
所以話，香港一日亂過一日，反對派固然要負最大責任，港府姑息養奸亦難辭其咎。呢，佔領鬧劇落幕三個幾月，警方展開三波拘捕行動，點知律政司遲遲唔落案檢控，至今未有一個人受到法律制裁。警方呢邊拉人，司法嗰邊放人，難怪香港愈來愈墮落喇。咪話太一叮唔提醒，政改方案年中表決，當局仲唔撥亂反正，盡快將牛鬼蛇神一網打盡，亂象陸續有來吖，叮！
第一手消息請下載on.cc東網
