俗語話，過得初一，過唔到十五，其實，就算過到十五，亦唔代表萬事大吉。呢，啱啱過咗農曆年咋，幾百名打工仔就被迫食無情雞，成為羊年首批失業大軍，講起真係幾可悲o架。
話說康文署轄下公共圖書館嘅外判商日前以無法按現行合約經營為由，單方面宣布即時停止運作，最少五百名資料管理員變相被炒魷，除咗二月份薪金未有着落，部分人甚至一月份糧都仲未出，估計欠薪超過百萬元。
受到事件影響，全港三十三間圖書館服務陷入一片混亂，還書車冇人推，書籍無法上架，借書要排長龍；有啲圖書館焗住要出動全體工作人員，連保安都要幫手執書，狼狽不堪。當然喇，圖書館運作倒瀉籮蟹仲係其次，最慘係大批資料管理員新年流流突然冇咗份工，唔徬徨就假。正如有工會人士指出，外判商合約未滿就終止運作，而且大規模裁員，非常罕見，政府監督外判不力，實在難辭其咎。
冇錯嘞，康文署將部分服務外判出去啫，冇理由連責任都外判埋，保障所有員工包括外判員工嘅權益，當局責無旁貸o架。話時話，涉事外判商今年一月起至開始為公共圖書館提供服務，短短時間內就多次違反合約被罰款，依家索性劈埋炮唔做添，搞到幾百名員工冇咗飯碗。睇嚟康文署唔止監管有問題，揀選外判商亦好有問題，如果唔係，點會玩咗兩個月就劈炮吖？
講開又講，家陣香港話就話接近全民就業，其實唔係咁好景嘅咋，呢批失業員工幾時至可以搵到新工，冇人敢寫包單。呢，預算案預測本年度經濟增長只有百分之二點三，下一年度亦只係介乎百分之一至三，連政府內部都承認唔算係好數字。加上外圍形勢麻麻哋，中國經濟面臨下行壓力，而美國又隨時加息，香港只能隨波逐流，望天打卦。最慘係隨着內地旅客消費力下降，香港零售業進入寒冬，而激進組織仲繼續上演「光復」鬧劇，令情況雪上加霜。
無論點都好喇，大批外判員工失業，就算唔係康文署嘅直接責任，亦唔可以袖手旁觀。當局首先應該幫員工向外判商追討欠薪，然後盡快檢討外判機制，加強監管，確保唔會再發生類似事件。咪話太一叮唔提醒，香港民怨已經夠大嘅喇，港產官僚唔好再添煩添亂吖，叮！
第一手消息請下載on.cc東網
