正月初二祭財神，家肥屋潤滿金銀。今日係迎接五路財神嘅大日子，太一叮喺度恭祝各位讀者，福星高照，財運亨通，周年旺相，事事順境！
新春許願特別靈o架，呢，喺黃大仙祠、車公廟同大埔林村等著名祈福熱點，呢兩日都人頭湧湧，水洩不通，市民一家大細前往上香許願，熱鬧不輸往年。嗱，政府總部都係市民祈願嘅熱點之一，有政黨帶同市民及其子女，呼籲財政司司長曾俊華喺年初七公布嘅財政預算案回應民生訴求，助民解困。有小朋友手持寫有「財爺」嘅利是封，搵財爺「逗利是」。遊行人士仲當場踢「財案賀歲波」添，希望鬍鬚曾「接波」，唔好卸波，放水協助基層家庭。
市民嘅心聲鬍鬚曾聽到未？咪又借咗聾耳陳隻耳，扮聽唔到吖。嗱，財神唔食人間煙火，幫唔幫到窮人只有天知道，財爺食納稅人俸祿，為民排憂解困係應有之義，責無旁貸。係人都知，庫房水頭充足，肥到連襪都着唔落，港府扶貧紓困，好應該吖。
呢，前排四大會計師行預測本財政年度盈餘，最保守嘅都有四百億元，最多嘅更加達到七百億元，等於鬍鬚曾舊年估計本年度九十一億元盈餘嘅七倍有多。鬍鬚曾出咗名算術差，成日估錯數未算死罪，但如果繼續撳實荷包一毛不拔，咁就太過分嘞。港府近排放聲氣，呢頭話經濟好轉，今年預算案要「減甜」；嗰頭又話收入勝過預期，預算案唔會「減甜」，反而會「加糖」添，一時一樣，到底想搞邊科，到時等預算案發表先知嘞。
大家一定記得，鬍鬚曾形容自己係「豐滿嘅許願樹」，人人有求，負荷過重喎。查實，呢棵樹腰粗幹壯，多多寶牒都掛得上喇。呢，連佢自己都承認，未來三年「年年有餘」，如果呢棵「人肉許願樹」唔掛寶牒，齋戙喺度，同廢柴有乜分別？
唔好唔知，家陣香港百物騰貴，打工仔生活壓力山大，你鬍鬚曾月入幾十萬仲有得加薪，錦上添花，就話可以印印腳飲咖啡睇法國電影扮「中產」啫，難為基層市民收入不增，開支猛增，入不敷支，苦過弟弟。預算案派糖雖然解決唔到根本問題，起碼可以甜下把嘴吖，係咪？
一句到尾，唔該鬍鬚曾醒醒定定，開倉濟貧，唔好再次令市民失望。你知喇，雞蛋冇眼亂咁飛，叮！
第一手消息請下載on.cc東網
