香港經常畀人批評缺乏旅遊景點，吸引唔到遊客，其實，香港唔係冇旅遊景點，而係港產官僚沉香當爛柴，既唔識得保護，又唔識得善用，結果咪得物無所用囉。
呢，前排港鐵沙中線土瓜灣站工地發現宋元古井，再次引發各界對文物保育嘅關注。唔講唔知，原來九龍城區議會○九年已經提出將區內多個歷史景點串連成「九龍城文物徑」，利用舊九龍城嘅名氣，帶動文化旅遊產業。點知當局一直歎慢板，研究嚟研究去，左三年右三年，足足六年過去，期間淨係交過一份更新計劃報告，之後就無晒下文，依家文物徑仲係無影無蹤，旅遊業界只能望天打卦，你話當局係咪捉到鹿唔識脫角吖！
係人都知，香港歷史離唔開九龍城，區內除咗有唔少宋代遺迹，仲有九龍城侯王古廟、九龍城寨衙門、龍津石橋遺址，同埋附近以「借庫」聞名嘅觀音廟等歷史建築，如果串連成為文物徑，唔止對了解本港嘅社會、政治及經濟歷史意義重大，而且可以成為新旅遊景點添。
正如有前古諮會成員話齋，推廣九龍城歷史，可以令年輕人清楚知道香港自古以來就係中國一部分，咁就唔會因為對歷史一知半解而提倡所謂港獨喇。可惜吖，近年古諮會關於九龍城文物徑嘅討論，竟然「一次都冇」，問你服未。
發展局發言人係咁講嘅，九龍城文物徑嘅提議「仍處於研究階段，暫未有新消息」喎。喂，已經研究咗六年，究竟仲要等到幾時至有「新消息」呢？好明顯，所謂研究根本係虛應故事，敷衍市民。
事實證明，港府眼高手低，保育純粹係大隻講，次次開頭都係威係勢，但三分鐘熱度過後，就好似乜都冇發生過，唔怪得畀人批評葉公好龍喇。最好笑嘅係，港府當年一口氣將一千四百幾幢物業列為歷史建築，淨係一級歷史建築就有二百二十幾幢，其中唔少係私人物業，結果被指侵犯私有產權，引起極大民怨，最後連古色古香、有八十幾年歷史嘅一級歷史建築何東花園都保唔住。相反，好似舊政府總部西座呢啲既冇特色、又冇歷史價值嘅建築物就獲得保留，簡直係本末倒置，九唔搭八。
所以話，政府靠得住，豬乸會上樹。旨意港產官僚保育，根本係緣木求魚，所謂九龍城文物徑，可能再等多六年仲係無影無蹤吖，叮！
第一手消息請下載on.cc東網
